Foto: TJM
Aqtóbe oblysynda tikushaq qulaǵan jerge qorǵanys ministriniń tapsyrmasy boiynsha ministrdiń orynbasary – áýe qorǵanysy kúshteriniń bas qolbasshysy, aviatsiia general-leitenanty Dáýren Qosanov basqaratyn arnaiy komissiia keldi, - dep habarlaidy «Ult aqparat».
Ushaq apatynyń aldyn ala sebebi tehnikalyq aqaý dep qarastyrylyp jatyr.
"Túpkilikti qorytyndy tergeý júrgizilgennen keiin jasalady. Zardap shekken ekipaj músheleri qajet meditsinalyq kómekpen, dári-dármektermen qamtamasyz etilgen jáne mamandardyń baqylaýynda", - dep jazylǵan habarlamada.
Qorǵanys ministrligi qaza tapqan áskeri qyzmetshiniń týystaryna materialdyq tólem, barlyq qajet qoldaý kórsetiletinin málimdedi.
Vedomstvo málimetinshe, Mi-8 tikushaqtary elimiz táýelsizdik alǵannan beri Áýe qorǵanysy kúshteriniń qoldanysynda. Tehnikanyń bul túri 50-den asa elde qoldanylady jáne óziniń kóp fýnktsionaldyǵy, senimdiliginiń arqasynda álemdegi eń kóp suranysqa ie tikushaqtardyń biri.
"Bul tikushaqqa sońǵy kúrdeli jóndeý 2023 jyly Almaty qalasynyń 405 aviatsiialyq-jóndeý zaýyty bazasynda jasaldy. Barlyq reglamenttik jumys, onyń ishinde ushý aldyndaǵy daiyndyq normativterge sáikes oryndaldy.
Tikushaq ekipajynyń da aitarlyqtai tájiribesi bar, kúndiz de, túnde de qiyn meteorologiialyq jaǵdailarda, onyń ishinde tótenshe jaǵdailarǵa tap bolǵan kezde de tapsyrmalardy oryndaý úshin kásibi túrde daiyndalǵan", - dep jazylǵan habarlamada.
