QR Qarýly Kúshteri Bas shtaby bastyǵynyń orynbasary, general-maior Ádilbek Aldabergenov jazda «Beket ata» oqý poligonynda jarylǵan granatadan jaraqat alǵan eki sarbazǵa qatysty mán-jaidy túsindirdi, dep habarlaidy "Ult aqparat" Qorǵanys ministrliginiń resmi saityna silteme jasap.
«Qoldaǵy bar málimetterge sensek, 2019 jyldyń 17 shildesinde sabaq kestesine sáikes «Beket ata» oqý-jattyǵý poligonynda jeke qurammen arnaiy oqý-jattyǵý júrgizildi. Bailanysshy, merzimdi qyzmettegi qatardaǵy jaýynger Koshlev oqý-jattyǵý ornynda bailanysshylarǵa jabdyqty kórsetý úshin tartylǵan bolatyn. Eshqandai jaýyngerlik tapsyrmany oryndaýy tiis emes edi», - dedi Ádilbek Aldabergenov.
Onyń aitýynsha, sabaqqa daiarlyq kezinde Koshlev árbir áskeri qyzmetshi bilýi tiis ereje - buiryqsyz eshqandai is-qimyl jasaýǵa bolmaitynyn bile tura buiryq berilmese de, basqa oqý núktesine qoiylǵan oq-dárige jaqyndap, F-1 granatasyn qolyna alǵan.
«Tutandyrǵyshyn burap, granata jarǵysh muryndyǵyn tartyp, tetigin iske qosty. Dybysyn estip, Tadiran radiostantsiiasynyń astyna salyp jiberdi. Koshlevpen birge qyzmet atqaryp júrgenderdiń sózine sensek, oǵan granatanyń jaýyngerlik ekeni eskertilgen. Jarylys saldarynan radiostantsiianyń aldyndaǵy qatardaǵy jaýyngerler Koshlev pen Jamanbaev jaralanǵan. Jaqyn mańdaǵy basqa áskeri qyzmetshiler zardap shekpegenimen, olarǵa da qaýip tóngen. Zardap shekken Koshlev pen Jamanbaevqa barlyq qajetti meditsinalyq jáne psihologiialyq bilikti qyzmet kórsetildi. Granatanyń jarylý faktisi boiynsha IIM Áskeri tergeý basqarmasy birden qylmystyq is qozǵady. Tergeý sharalary júrgizilýde. IIM Áskeri tergeý basqarmasynyń suraýy boiynsha áskeri bólim keltirgen zalaldyń baǵasy berildi. Kelgen zalaldyń ornyn toltyrý boiynsha suraqtar Qorǵanys ministrliginiń quziretine jatpaidy. Sheshimdi sot qabyldaidy», - deidi ol.
Sonymen birge, 2019 jylǵy 23 shildede ártúrli deńgeidegi jaýapty komandirlerdiń tarapynan qyzmettik mindetterdi tiisti oryndamaý faktisi boiynsha qylmystyq is qozǵalǵany da habarlandy.
«Qosymsha Qarýly kúshterdiń ishki qyzmet Jarǵysyn buzý faktisi tekserilýde. Osy jaǵdaidaǵy áskeri qyzmetshilerdiń is-áreketterin obektivti baǵalaý – osyndai fakttarǵa budan ary jol bermeý úshin qajet», - dedi Ádilbek Aldabergenov.
Eske sala ketsek, osy jazda Mańǵystaý oblysynyń Beineý aýdanynda ornalasqan №99116 áskeri bóliminiń merzimdi qyzmettegi eki sarbazy jarylǵan granatadan jaraqat alǵan bolatyn.
