Qorǵanys ministrligi áskeri tehnikanyń áskerlerdiń jaýyngerlik daiarlyq sheńberindegi qozǵalysyna túsinik berdi, dep habarlaidy "Ult aqparat" vedomstvonyń baspasóz qyzmetine silteme jasap.
"Qazaqstannyń Qarýly kúshterinde jeke quramnyń ornyn aýystyrýǵa, oqytýǵa, jattyqtyrýǵa bailanysty áskerlerdiń jaýyngerlik ázirligi men jaýyngerlik daiarlyǵyn arttyrý sharalary josparly túrde ótkiziledi.
Osy kúnderi Qorǵanys ministrligi Áskeri kolledjiniń oqýshylaryna praktikalyq sabaqtar ótkizý úshin Semei garnizonynan Shýchinsk qalasyna áskeri tehnika jóneltildi" - deidi ministrlik ókilderi.
Sondai-aq, 25 aqpan men 3 naýryz aralyǵynda Qaraǵandydan Gvardeisk garnizonyna, sondai-aq Almatydan Aqtaý garnizonyna áskeri tehnika jiberilgen.
"1-4 naýryz aralyǵynda Shymkentten Tarazǵa, Túrkistanǵa, «Aisha-bibi» poligonyna jáne keri baǵytta Qarýly kúshterge tiesili tehnikalardyń qozǵalysy josparlanyp otyr.
Atalǵan kezeńde jóndeý jumystaryn júrgizý úshin áskeri tehnikalardy temir jol kóligimen Batys Qazaqstannan eldiń ońtústik bóligine josparly túrde jetkizý iske asyrylý ústinde" - delingen resmi habarlamada.
