Qorǵanys ministrligi Shymkentte áskeri dýlyǵalar metall ótkizý ornynda jatqany týraly daýly videoǵa qatysty pikir bildirdi, - dep habarlaidy Tengrinews.kz agenttigi.
Áleýmettik jelilerde áskeri kaskalar "metall jinaý ornyna ótkizilgeni" týraly video tarap jatyr. TikTok qoldanýshysy bul Shymkenttegi metall jinaý orny ekenin aitady.
"Qazaqstan Respýblikasynyń qorǵanys ministri, dýlyǵalaryńyz bizde metall qabyldaý ornynda jatyr. Bul - Qazaqstan, bul - Shymkent", - deidi videoda.
Áskeri bas kiimder Qorǵanys ministrligine tiesili degen aqparatty vedomstvo joqqa shyǵardy. Urlyq nemese joǵaltý derekteri de rastalmady. Video avtory jalǵan aqparat taratqany úshin jaýapqa tartyla ma, joq pa, naqtylanbady.
"Áleýmettik jelilerge monitoring júrgizý barysynda TikTok videoplatformasyndaǵy arnalardyń birinde áskeri kaskalardyń metalǵa ótkizilgeni týraly video jariialanǵany anyqtaldy.
Bul áskeri kaskalar Qorǵanys ministrligine tiesili emes ekenin habarlaimyz. Osyǵan bailanysty qorǵanys isteri jónindegi bólimmen tekserý júrgizilip, onyń nátijesinde Qazaqstan Respýblikasy Qarýly Kúshteriniń áskeri bólimderinde áskeri múlikti (áskeri kaska) urlaý jáne joǵaltý derekteriniń joqtyǵy anyqtaldy", - delingen QR Qorǵanys ministrliginiń baspasóz qyzmeti habarlamasynda.
