Arystaǵy oq-dári qoimasyndaǵy jarylystan qaza tapqandardyń sany áldeqaida kóp bolýy múmkin edi. Bul týraly QR Qorǵanys ministriniń orynbasary, general-maior Baqyt Qurmanbaev aitty, dep habarlaidy QazAqparat.
«Ahýaldy ýshyqtyrǵym kelmeidi. Biraq, qaza tapqandar men tragediia aýqymy munan da úlken bolýy yqtimal edi. Jaǵdai atalǵan óńirdegi ystyq klimatqa bailanysty da kúrdelene tústi», - dedi ol.
Onyń atap ótýinshe, keibir snariadtar tym uzaqqa ushyp ketken. Tipti bir snariadtyń 15 shaqyrym jerge baryp qulaǵany da anyqtalyp otyr. Áskeri órt sóndirý komandasy arsenaldaǵy órtpen 1 táýlik boiy kúresip, jaralystardyń odan ary taralýyna jol bergen joq.
«Oq-dári qulaǵan jerlerdiń birde-birinde jarylys oryn alǵan joq. Bul barlyq oq-dárilerdiń jarǵysh biltesiz saqtalýymen bailanysty bolyp otyr. Jarǵysh bile jeke saqtalady. Olardyń negizgi bólimi sol arsenaldyń ózinde qaldy», - dedi Qorǵanys ministriniń orynbasary.
Generaldyń atap ótýinshe, Resei, Tájikstan jáne AQSh-tan sarapshylar kelip, Arysta júrgizilgen jumystarǵa baǵa bergen.
«Olar táýelsiz baǵalaryn berdi. Halyqaralyq sarapshylar ondaǵan myń tonna oq-dári jarylǵan kezde qalanyń barynsha az qiraýy, azamattyq turǵyndar arasynda qaza tapqandar sanynyń barynsha az bolýy álemdik tájiribedegi teńdessiz oqiǵa ekendigin atap ótti. Jarylys barysynda bir áskeri qyzmetshi emes azamat qaitys boldy. Árine, biz úshin árbir adam ómiri qymbat», - dedi ol.
