Elordada Qorǵanys ministrliginiń alqa otyrysy ótip, onda oqý jylynyń qorytyndysy shyǵaryldy, dep habarlaidy "Ult aqparat" vedomstvonyń baspasóz qyzmetine silteme jasap.
Bul otyrysqa qorǵanys vedomstvosynyń basshylyǵy, ásker túrleriniń bas qolbasshylary, óńirlik qolbasshylyqtar men ásker tekteriniń qolbasshylary qatysyp, barlyq garnizondar beinekonferentsiia bailanysy arqyly qosyldy.
El Prezidenti – Qarýly kúshterdiń Joǵarǵy Bas qolbasshysy Qasym-Jomart Toqaevtyń 2020 jylǵy qarashadaǵy alqa otyrysynda bergen tapsyrmalaryn júzege asyrýdyń aralyq qorytyndylary shyǵaryldy.
Otyrys barysynda áskerlerdiń tynys-tirshiligine qatysty barlyq másele qarastyryldy. Eń aldymen, Qarýly kúshterdiń basty mindeti – jaýyngerlik ázirlikti qoldaý, jeke quramnyń jaýyngerlik mashyǵyn jáne basqarý organdarynyń úilesimdiligin arttyrý máseleleri oryndalǵany ataldy.
«Áskerlerdiń jaýyngerlik oqytý aiasynda jedel daiarlyqtyń qarqyny 16%-ǵa, al jaýyngerlik daiarlyq 5%-ǵa artty. Bul rette 19 500-ge jýyq is júzinde atys, jaýyngerlik mashinalardy júrgizý boiynsha 9 000 sabaq ótkizildi.
Áýe qorǵanysy kúshterinde jaýyngerlik oqý-jattyǵý ushýlary men áýe shabýylyna qarsy qorǵanys bólimsheleriniń oqý-jattyǵýy basty nazarda boldy. Qarýly kúshterdiń atalmysh ásker túrinde jaýyngerlik daiarlyqtyń jalpy sany 25%-ǵa artty.
Áskeri teńizshiler 17 ret teńizge shyǵyp, 2245 keme jattyǵýyn ótkizdi. Súńgýir bólimsheleri jalpy 112 saǵatyn sý astynda ótkizgen, 180 ret teńizge túsý tájiribesin oryndady», delingen habarlamada.
Vedomstvonyń málimdeýinshe, barlyq jaýyngerlik daiarlyq is-sharalary qazirgi zamanǵy qarýly qaqtyǵystar tájiribesin eskere otyryp uiymdastyrylady. Áskerlerdi oqytý men qoldanýda jańa tásilder belsendi túrde engizilip jatyr.
Sondai-aq, eki jaqty taktikalyq oqý-jattyǵýlardyń tájiribesi keńinen qoldanylyp keledi.
Naýryz aiynda «Mátibulaq» poligonynda Qarýly kúshter tarihynda alǵash ret eki jaqty brigadalyq taktikalyq oqý-jattyǵý ótti. Onda mehanikalandyrylǵan jáne shabýyldaý brigadalary bir-birine qarsy turdy.
«Altyn jebe» keshendi tekserý barysynda qys mezgilinde shyǵysta jáne batys óńiriniń shóldi aimaqtarynda arnaiy operatsiialar kúshteri quralymdarynyń tájiribelik is-qimyly pysyqtaldy. Budan ózge, alǵash ret Mańǵystaý oblysyndaǵy avtomobil jolynyń áýeailaǵyna Sý-27 joiǵyshy men S-295 áskeri-kólik ushaǵy qondy. Keiinnen bul ádisti oqý-jattyǵý barysynda jaýyngerlik tapsyrmalardy oryndaý úshin jeke quramdy jetkizý kezinde qoldandy.
«Qalqan-2021» birlesken jedel-taktikalyq oqý-jattyǵý sheńberinde alǵash ret teńiz jaǵalaýynda mindetterdi oryndaǵan Arnaiy operatsiialar kúshteriniń toby quryldy. Bul oqý-jattyǵýǵa ushqyshsyz ushý apparattarynyń bólimsheleri keńinen jumyldyryldy. Sý asty jáne sý ústi tásilderin qoldaný arqyly júzgish jaýyngerlerdi teńizge túsirý oryndaldy. Ottegi jabdyǵyn qoldana otyryp, joǵary biiktikterden desant túsirý, áýe arqyly syrtqy aspada utqyr tehnikany tasymaldaý jáne shabýyldaý toptaryn tikushaqtardan túsirý iske asyryldy.
Teńiz jaiaý áskerleriniń shartty qarsylasty joiý boiynsha shekarashylarmen ózara is-qimyl máseleleri pysyqtaldy. Osy oraida, «Saq qorǵany» tank bólimsheleriniń jańa is-qimyly synaldy.
«Armiia halyqaralyq oiyndarǵa daiyndalý barysynda áskeri qyzmetshiler kásibi sheberlikterin jetildirilýde. Qazaqstandyq jaýyngerler biyl 11 konkýrsqa qatysýdy josparlap otyr. Onyń ishinde 2-ýi óz elimizde ótedi.
Áskerdi jańa tehnikamen jaraqtaý úrdisi jalǵasýda. Áskeri synaqtardan sátti ótken, jańa «Býk» zenittik-zymyran keshenderi men otandyq «Nur» radiolokatsiialyq stantsiialary kezekshilik atqarýda. Sonymen qosa, Sý-30SM joiǵyshtarynyń kezekti legi jetkizildi.
Otandyq qorǵanys ónerkásibi kesheni kásiporyndarynda áskeri tehnikany kúrdeli jóndeý jáne jańartý iske asyrylýda», delingen habarlamaad.
Áskeri tehnikany óz kúshimen qalpyna keltirý múmkindikteri jetildirilýde. Mamandandyrylǵan áskeri bólimder men brigada bólimshelerinde 1200-den astam tehnika aǵymdyq jáne orta jóndeýden ótkizildi. Almatyda brondy tank pen zymyran-artilleriialyq qarý-jaraǵyn jóndeý boiynsha sońǵy úlgidegi tseh iske qosyldy.
Ǵylymi-óndiristik, utymdy jáne ónertapqysh jumystary jandandyryldy. Ulttyq qorǵanys ýniversiteti ǵalymdarynyń qazaqstandyq kásiporynmen birlesip shyǵarǵan alǵashqy otandyq «Shaǵala» ushqyshsyz ushý apparaty synaqtan ótti.
Áskerlerde atys jáne arnaiy daiarlyqqa arnalǵan birqatar oqý quraldary ázirlendi. Osy qyzmettiń nátijelerin uiymdastyrýdy, sondai-aq yntalandyrýdy jáne praktikada qoldanýdy kózdeitin erejeni ázirleý týraly tapsyrmalar berildi.
Qarýly kúshterdiń qorǵanys-ónerkásip keshenimen ózara qarym-qatynasty retke keltirý jóninde sharalar qabyldandy. Qorǵanys ministrligi áskerdiń ǵylymi-tehnikalyq áleýeti men qajettilikterin eskere otyryp, otandyq kásiporyndarda asa mańyzdy áskeri ónim shyǵarý týraly negizgi 9 baǵytty usyndy.
Áskeri infraqurylymdy jetildirý sheńberinde tez salynatyn qurylystan obektiler salý tájiribesin keńeitý boiynsha jumys júrgizilýde. Bul biýdjet qarajatyn únemdeýge jáne ǵimarattar salý merzimin qysqartýǵa múmkindik beredi.
«Áskeri tártip jáne áskeri qyzmet qaýipsizdiginiń máseleleri jeke qaraldy. Quqyq tártibin saqtaý úshin komandirlerdiń jeke jaýapkershiligin kúsheitýge arnalǵan osyǵan deiin belgilengen baǵyt aiasynda birneshe laýazymdy tulǵa jumysty tiisinshe uiymdastyrmaǵany úshin atqaratyn qyzmetinen shettetildi.
Sybailas jemqorlyqqa qarsy is-qimyl ózekti másele kúiinde qalyp otyr. Sonymen qatar, qabyldanǵan sharalardyń arqasynda ótken kezeńde sybailas jemqorlyqpen quqyq buzýshylyqtar sanynyń tómendeýi baiqalady. Jemqorlyq júieli emes, onyń biýdjet qarajatyn aýqymdy qymqyrýmen de bailanysy joq, bul jemqorlyq túrleri turmystyq, tulǵaaralyq sipatqa ie.
Atap aitqanda, baiandamada qiyn jaǵdaiǵa tap bolǵan áriptesterine, onyń ishinde balalaryn emdeýge kómektesý úshin jalaqy men syilyqaqylardan aqsha jinaý jalǵasýda. Bul niettiń jaqsy oidan týǵanyna qaramastan, atalmysh faktilerge jol berýge bolmaidy jáne ol zańsyz áreketter retinde qýdalanady. Osyǵan bailanysty, bundai is-sharalardy júzege asyrýdyń zańdy tetigin pysyqtaý qajet.
Sybailas jemqorlyq táýekelderin joiýǵa qatysty jumysty jalǵastyrý tapsyryldy. Onyń negizgi baǵyttary – kadrlardy irikteý jáne zerdeleý, ómirdiń barlyq salalaryndaǵy ashyqtyqty qamtamasyz etý, kórsetiletin qyzmetterdi tsifrlandyrý, iaǵni adami faktordy barynsha azaitý, sondai-aq basshylar tarapynan baǵynystylardyń zańdy saqtaýdaǵy jaýapkershiliktiń bolýy», delingen habarlamada.
Ministrliktegi áleýmettik qamsyzdandyrýǵa máselesi aityldy. Qorǵanys vedomstvosynyń bastamasymen 2021 jyldan bastap áskeri qyzmetshilerdiń azyq-túlik úlesiniń quny orta eseppen 40 paiyzǵa artty. Laýazymdyq jalaqylar ósti.
Jabyq áskeri qalashyqtarda turatyn burynǵy áskeri qyzmetshilerdi turǵyn úimen qamtamasyz etý máselesi josparly túrde sheshilýde. Árbir garnizon úshin elektrondyq formatta júrgiziletin turǵyn úi alýǵa kezektilik retke keltirildi. Jeke quramnyń áleýmettik ahýalyn jaqsartý jónindegi jumysty jalǵastyrý josparda bar.
2020 jyldaǵydai, Qarýly kúshter koronavirýs infektsiianyń taralýyna qarsy kúreste barynsha úles qosýda. Elordalyq jáne Almaty áskeri gospitaldary COVID-statsionarlarǵa retinde jabdyqtaldy. Basqa da áskeri emdeý mekemeleri men dárigerlik-meiirbikeler brigadalary azamattyq densaýlyq saqtaýǵa kómektesýge ázir. Birqatar garnizondarda ákimdikterdiń suraýy boiynsha bólimsheler áleýmettik mańyzy bar obektilerdi dezinfektsiialaýǵa tartyldy.
Ujymdyq immýnitetti qalyptastyrý sheńberinde Qarýly kúshterdiń jeke quramy vaktsinatsiialaýǵa belsendi qatysty. Áskeri qyzmetshiler men azamattyq personaldyń 94%-dan astamy ekpe aldy. Tek meditsinalyq qarsy kórsetilimderi barlarǵa ekpe salynbady.
«Alqa otyrysynyń sońynda aldaǵy jazǵy oqý kezeńi qarqyndy jáne mazmundy bolatyny atap ótildi. Barlyq salada kóptegen mańyzdy sharalardy oryndaý qajet, al olardyń qorytyndysy jyl sońynda shyǵarylady.
Memleket basshysynyń Qorǵanys ministrligi basqa memlekettik organdarmen birlesip ázirlegen Qarýly kúshterdi, basqa da áskerler men áskeri quralymdardy damytýdyń 2030 jylǵa deiingi el áskerin jetildirýdiń basty baǵyttaryn aiqyndaityn tujyrymdamasyn bekitýi mańyzdy oqiǵa bolýǵa tiis», delingen habarlamada.
