Qarýly kúshterdiń jeke quramyna ekpe salý jumysy qalai júrip jatyr? Bul jaily bas áskeri meditsina bastyǵynyń orynbasary, meditsina qyzmetiniń polkovnigi Álibek Manabaev arnaiy brifingte tolyǵyraq aityp berdi, dep habarlaidy QazAqparat.
«Jyldyń sońyna deiin bizder áskerilerdi tolyq vaktsinalaýdy josparlap otyrmyz. Árine 100 paiyz bolmaidy, óitkeni meditsinalyq qarama-qaishylyqtar bolady. Ol - bas sanitar dárigerdiń qaýlysynda kórsetilgen júktiler, bala emizetinder, qandai da bir aýrýlary bar adamdar. Áskeriler ǵylymi synaqtarǵa, klinikalyq zertteýlerge qatyspaidy. Bul halyq densaýlyǵy jáne densaýlyq saqtaý júiesi kodeksinde qarastyrylǵan» dep atap ótti polkovnik.
Ol sondai-aq áleýmettik jelilerde taraǵan «áskeri qyzmetshilerdi ekpe salýǵa májbúrleidi» degen aqparatqa qatysty pikir bildirdi.
«Bul aqparatty ras deýge kelmeidi. Óitkeni árbir áskeri ortada áskeri qyzmetshi óziniń basshylary, komandirlerine elikteý arqyly vaktsinatsiia alýǵa talpynady. Mysalǵa bólim komandiri, meditsina qyzmetkerleri ótkennen keiin olar da ekpe alyp, qatardan qalmaýǵa tyrysady. Qorǵanys ministrliginde ekpe saldyrǵandardyń eń alǵashqylary - Qorǵanys ministriniń ózi, onyń orynbasarlary, bas qolbasshylary. Árine, meditsinalyq qarsy kórsetilimi bar adamdar ǵana ekpe alǵan joq» dep túiindedi Álibek Manabaev.
