Búgin Májilistegi áskeri bilim berý men ǵylymdy damytý, áskeri-patriottyqty qalyptastyrý máseleleri boiynsha ótken úkimet saǵatynda kýrsanttardy tamaqtandyrý máselesi qozǵaldy, dep habarlaidy Baq.kz tilshisi.
Májilis depýtaty Qudaibergen Erjan áskeri kýrsanttardy úsh mezgil tamaqpen qamtamasyz etý konkýrsynda tómen baǵa usynatyn firmalardyń tenderdi jeńip alatynyn aitty.
«Áskeri taǵam quny 1225 teńge, qatelespesem. Bul memlekettiń úsh mezgil tamaqtanýǵa bólip otyrǵan qarajaty. Degenmen de bul tamaqtandyrý jeke kásipkerlerdiń memlekettik satyp alý jónindegi mindetine kele me? Tenderdi utyp alý úshin 700 teńgeniń tóńireginde tómen baǵada alyp jatqanyn bilemiz. Bul somaǵa azamattardy sapaly tamaqtandyrý máselesi kúmán týǵyzady. Osy jóninde taǵamnyń energetikalyq quramyn, sapasyn qadaǵalaý jóninde tapsyrmalar berile me eken? Qorǵanys ministrligi tapsyrys berýshi retinde tender ótkizip, jeńimpazdy anyqtap jatyr. Tolyǵymen osy aitylǵan somaǵa sapaly tamaq berý úshin qandai kedergiler bar?», - dep saýalyn joldady depýtat Qudaibergen Erjan.
Qorǵanys ministri Sáken Jasuzaqov tómen baǵamen tenderdi utyp alatyn firmalardyń áskeri kýrsanttardy qalai tamaqtandyratynyna ózi de tańdanatynyn jetkizdi.
«1225 teńge, bul táýligine 4231 kilokaloriiamen qamtamasyz etedi. Sarbazdardy, kýrsanttardy úsh ret tamaqtandyrý kerek. Konkýrsty utyp alý úshin firmalar óz qyzmetteriniń qunyn 659 teńgege tómendetedi. Biz olarǵa eshteńe dei almaimyz. Zań boiynsha konkýrs ótedi. Biyl 200-den asa firma konkýrsqa qatysty. Kim kem beredi, sol utady. Bul durys emes. Basqa jaǵyna qaramaidy. «Bulai bolmaidy ǵoi» dep osyǵan bailanysty Premer-ministrge hat jazdym. Osy júieni alyp tastaý kerek. Mysaly Bilim jáne ǵylym ministrliginiń mektepterge arnalǵan printsipi sekildi standartty Qorǵanys ministrligi bekitip, tamaqtanýdy qadaǵalap otyrsaq deimiz. Firmanyń 700-800 teńgege áskeri institýt kýrsantyn qalai tamaqtandyratynyn bilmeimin», - dedi ministr.
Májilis vitse-spikeri Vladimir Bojko Parlamentte memlekettik satyp alýlar týraly zańnyń qaralyp jatqanyn, osy máselege bailanysty ekinshi oqylymǵa deiin zańǵa ózgerister engizý múmkin ekenin atap ótti.
«Bul máseleni Qorǵanys minitsrliginde talqylai berýdiń qajeti joq. Áskeri qyzmetkerdiń fiziologiiasyn energiiamen qamtamasyz etý anyqtalǵan, tamaqtandyrý baǵasy anyqtalǵan. Tamaqtandyrý 1,2 myń teńge dep bekitilse ony tómendetý bolmaý kerek. Ekonomika ministrligi osy máselemen ainalyssa, mektepti aittyq kezinde, endi áskeri mekemeler, erteń meditsina mekemelerinde osyndai másele bolatyn shyǵar. Eki ese arzan baǵada adamnyń qarnyn toidyryp otyrǵanda basqa jaǵdai jasaýdyń qajeti joq. Saban beremiz be, qaitemiz?» - dedi Vladimir Bojko.
