بٷگٸن مەجٸلٸستەگٸ ەسكەري بٸلٸم بەرۋ مەن عىلىمدى دامىتۋ, ەسكەري-پاتريوتتىقتى قالىپتاستىرۋ مەسەلەلەرٸ بويىنشا ٶتكەن ٷكٸمەت ساعاتىندا كۋرسانتتاردى تاماقتاندىرۋ مەسەلەسٸ قوزعالدى, دەپ حابارلايدى Baq.kz تٸلشٸسٸ.
مەجٸلٸس دەپۋتاتى قۇدايبەرگەن ەرجان ەسكەري كۋرسانتتاردى ٷش مەزگٸل تاماقپەن قامتاماسىز ەتۋ كونكۋرسىندا تٶمەن باعا ۇسىناتىن فيرمالاردىڭ تەندەردٸ جەڭٸپ الاتىنىن ايتتى.
«ەسكەري تاعام قۇنى 1225 تەڭگە, قاتەلەسپەسەم. بۇل مەملەكەتتٸڭ ٷش مەزگٸل تاماقتانۋعا بٶلٸپ وتىرعان قاراجاتى. دەگەنمەن دە بۇل تاماقتاندىرۋ جەكە كەسٸپكەرلەردٸڭ مەملەكەتتٸك ساتىپ الۋ جٶنٸندەگٸ مٸندەتٸنە كەلە مە? تەندەردٸ ۇتىپ الۋ ٷشٸن 700 تەڭگەنٸڭ تٶڭٸرەگٸندە تٶمەن باعادا الىپ جاتقانىن بٸلەمٸز. بۇل سوماعا ازاماتتاردى ساپالى تاماقتاندىرۋ مەسەلەسٸ كٷمەن تۋعىزادى. وسى جٶنٸندە تاعامنىڭ ەنەرگەتيكالىق قۇرامىن, ساپاسىن قاداعالاۋ جٶنٸندە تاپسىرمالار بەرٸلە مە ەكەن? قورعانىس مينيسترلٸگٸ تاپسىرىس بەرۋشٸ رەتٸندە تەندەر ٶتكٸزٸپ, جەڭٸمپازدى انىقتاپ جاتىر. تولىعىمەن وسى ايتىلعان سوماعا ساپالى تاماق بەرۋ ٷشٸن قانداي كەدەرگٸلەر بار?», - دەپ ساۋالىن جولدادى دەپۋتات قۇدايبەرگەن ەرجان.
قورعانىس مينيسترٸ سەكەن جاسۇزاقوۆ تٶمەن باعامەن تەندەردٸ ۇتىپ الاتىن فيرمالاردىڭ ەسكەري كۋرسانتتاردى قالاي تاماقتاندىراتىنىنا ٶزٸ دە تاڭداناتىنىن جەتكٸزدٸ.
«1225 تەڭگە, بۇل تەۋلٸگٸنە 4231 كيلوكالورييامەن قامتاماسىز ەتەدٸ. ساربازداردى, كۋرسانتتاردى ٷش رەت تاماقتاندىرۋ كەرەك. كونكۋرستى ۇتىپ الۋ ٷشٸن فيرمالار ٶز قىزمەتتەرٸنٸڭ قۇنىن 659 تەڭگەگە تٶمەندەتەدٸ. بٸز ولارعا ەشتەڭە دەي المايمىز. زاڭ بويىنشا كونكۋرس ٶتەدٸ. بيىل 200-دەن اسا فيرما كونكۋرسقا قاتىستى. كٸم كەم بەرەدٸ, سول ۇتادى. بۇل دۇرىس ەمەس. باسقا جاعىنا قارامايدى. «بۇلاي بولمايدى عوي» دەپ وسىعان بايلانىستى پرەمەر-مينيسترگە حات جازدىم. وسى جٷيەنٸ الىپ تاستاۋ كەرەك. مىسالى بٸلٸم جەنە عىلىم مينيسترلٸگٸنٸڭ مەكتەپتەرگە ارنالعان پرينتسيپٸ سەكٸلدٸ ستاندارتتى قورعانىس مينيسترلٸگٸ بەكٸتٸپ, تاماقتانۋدى قاداعالاپ وتىرساق دەيمٸز. فيرمانىڭ 700-800 تەڭگەگە ەسكەري ينستيتۋت كۋرسانتىن قالاي تاماقتاندىراتىنىن بٸلمەيمٸن», - دەدٸ مينيستر.
مەجٸلٸس ۆيتسە-سپيكەرٸ ۆلاديمير بوجكو پارلامەنتتە مەملەكەتتٸك ساتىپ الۋلار تۋرالى زاڭنىڭ قارالىپ جاتقانىن, وسى مەسەلەگە بايلانىستى ەكٸنشٸ وقىلىمعا دەيٸن زاڭعا ٶزگەرٸستەر ەنگٸزۋ مٷمكٸن ەكەنٸن اتاپ ٶتتٸ.
«بۇل مەسەلەنٸ قورعانىس مينيتسرلٸگٸندە تالقىلاي بەرۋدٸڭ قاجەتٸ جوق. ەسكەري قىزمەتكەردٸڭ فيزيولوگيياسىن ەنەرگييامەن قامتاماسىز ەتۋ انىقتالعان, تاماقتاندىرۋ باعاسى انىقتالعان. تاماقتاندىرۋ 1,2 مىڭ تەڭگە دەپ بەكٸتٸلسە ونى تٶمەندەتۋ بولماۋ كەرەك. ەكونوميكا مينيسترلٸگٸ وسى مەسەلەمەن اينالىسسا, مەكتەپتٸ ايتتىق كەزٸندە, ەندٸ ەسكەري مەكەمەلەر, ەرتەڭ مەديتسينا مەكەمەلەرٸندە وسىنداي مەسەلە بولاتىن شىعار. ەكٸ ەسە ارزان باعادا ادامنىڭ قارنىن تويدىرىپ وتىرعاندا باسقا جاعداي جاساۋدىڭ قاجەتٸ جوق. سابان بەرەمٸز بە, قايتەمٸز?» - دەدٸ ۆلاديمير بوجكو.
