Áskeri qoimadaǵy jarylys dúmpýinen qiraǵan kafe. Jambyl oblysy Baizaq aýdany Sarykemer aýyly. 27 tamyz 2021 jyl.
Jambyl oblysynda jarylǵan áskeri qoimadaǵy oq-dári osydan eki jyl buryn Arys qalasynan ákelingen. Bul týraly Qazaqstan qorǵanys ministri Nurlan Ermekbaev aitty, dep habarlaidy Azattyq.
Jambyl oblysy Baizaq aýdanyndaǵy áskeri qoima jarylǵan jaqqa barǵan Qazaqstan Qorǵanys ministri Nurlan Ermekbaevtyń sózinshe, osydan eki jyl buryn Arys qalasyndaǵy áskeri qoimalardan ákelingen injenerlik oq-dáriler 3 km-ge deiin ushýy múmkin.
Ministr boljamynsha, jarylysqa qaýipsizdik talaptary saqtalmaýy sebep boýy, himiialyq reaktsiiamen ózdiginen týýy nemese diversiia bolýy da múmkin.
Nurlan Ermekbaev jarylystan qaza tapqan 4 adamnyń aty-jónin aitty.
- Ońtústik okrýgtiń áskeri prokýrory polkovnik Qapezov, serjant Marat Meshinbai, efreitor Rýslan Janbolatov jáne áskeri kúzet qyzmetkeri Orazbek Dálibaev mert boldy. Týystaryna áriptesterimniń atynan kóńil aitamyn, - dedi ministr.
Ministrdiń sózine qaraǵanda, jarylystan keiin habar-osharsyz ketken birneshe adam izdestirilip jatyr.
26 tamyz kúni keshke Jambyl oblysy Baizaq aýdanyndaǵy qoimada órt shyǵyp, oq-dári jarylǵan. Birneshe kúshti dúmpý bolyp, jaqyn mańdaǵy eldimekender evakýatsiialanǵan.
2019 jyly 24 maýsymynda Arystaǵy áskeri oq-dári qoimasy jarylyp, tórt adam qaza tapqan edi.
Jarylys bolǵan kúni myńdaǵyn úi zaqymdanyp, Arystyń 40 myńnan astam turǵyny Shymkent qalasy men tóńiregindegi eldimekenderge evakýatsiialanǵan. Olar keiinirek Arysqa qaita oralǵan.
Resmi málimet boiynsha, qaladaǵy 7 527 úi men kópqabatty 103 turǵyn úi zaqymdanǵan. Paidalanýǵa jaramsyz bolyp qalǵan 420 úi men 3 kópqabatty turǵyn úi qulatylǵan.
Biyl 26 shildede Shymkent qalasyndaǵy áskeri bólimde Túrkistan oblysy Arys qalasyndaǵy áskeri qoimadaǵy jarylysqa qatysty aiyptalǵan 16 adam sottalǵan edi.
