Qorǵanys ministri Nurlan Ermekbaev qalyp qoiǵan snariadtar týraly birden habar berýdi ótindi, dep habarlaidy Sputnik Qazaqstan.
Ministrdiń aitýynsha, áskeri arsenalda bolǵan granatalar men oq-dáriler qoimanyń ishinde jaryldy. Al reaktivti snariadtar 8 shaqyrymǵa deiin ushqan. Biraq atalǵan snariadtardyń jarylǵyshtary bolǵan joq.
"Qulaǵan jerinde birde-bir snariad jarylmady. Órt snariadtyń qyzyp turǵan temir korpýsynan shyqqan. Al qaladaǵy nysandar jarylys tolqynynan jáne qulaǵan snariadtardyń saldarynan qiraǵan. Degenmen, azamattar qalyp qoiǵan keibir oq-dárilerdi taýyp, ony durys ustamasa, qaýipti jaǵdai týyndaýy múmkin", - dedi Ermekbaev elordada ótken baspasóz máslihatynda.
Onyń sózine qaraǵanda, máselen, snariadty kesip, baǵaly metalyn alamyn dese, ia bolmasa, metall qabyldaityn jerge tapsyramyn dese, olarǵa qaýip tónýi múmkin. Degenmen saperler birden jumysqa kirisken. Budan bólek, dezinfektsiia sharalary jasaldy.
"Qazirgi kezde saperler ekinshi ret tekseris jasaýǵa kiristi. Búginde 41 arnaiy injenerlik-saperlik top bar. 800-den astam áskeri qyzmetker snariadtardy izdestirý sharalaryna qatysýda. Sosyn mobildi saperlik beketter ashyldy. Sol jerge kúdikti zattar týraly habar berýge bolady", - dep atap kórsetti Ermekbaev.
