QR Qorǵanys miinstri Nurlan Ermekbaev Arystaǵy jarylysta mert bolǵan áskerilerdiń otbasyna tólenetin ótemaqy týraly aitty, dep habarlaidy QazAqparat.
Eń aldymen ministr Qarýly kúshterdiń jeke quramy atynan jarylysta mert bolǵan úsh azamattyń otbasyna kóńil aitty.
«Qoldanystaǵy zańnamaǵa sáikes, qyzmettik mindetin atqarýda mert bolǵan áskerilerdiń otbasynda birqatar tólemder qarastyrylǵan. Máselen, laýazymyna bailanysty 5 jyldyq eńbekaqy kóleminde bir rettik tólem, jeke baspana alý úshin bir rettik tólemdi aitýǵa bolady. Ótemaqy kólemi áskeri qyzmetshi jumys istegen óńir men otbasy músheleriniń sanyna bailanysty beriledi», - dedi N. Ermekbaev Ortalyq kommýnikatsiialar ortalyǵynda ótken baspasóz máslihatynda.
Sonymen birge, marqumdy jerleý, eskertkish turǵyzý, máiitti jerleý ornyna jetkizý shyǵyndary kóteriledi. Ózge azamattardyń erikti aýdarymdaryna ruqsat beriledi.
«Bizdiń tájiribemiz boiynsha, qaza tapqan áskerilerdiń balalaryn jergilikti áskeri organdar beiresmi qamqorlyqqa alady. Olardyń oqýynda, jumysqa ornalasýynda nemese ózge de máselelerde kómektesýge tyrysamyz», - dedi ministr.
