© Photo : Ministerstvo oborony Kazahstana
Qorǵanys ministri Rýslan Jaqsylyqov Qazaqstan armiiasynda jalpy alǵanda álimjettik joq ekenin málimdedi, dep habarlaidy Sputnik Qazaqstan.
"Eń aldymen, álimjettik degen ne ekenin anyqtap alaiyq. Jalpy alǵanda armiiada álimjettik joq. Bir merzimde shaqyrylǵan áskeri qyzmetshiler arasynda janjalǵa ákep soqqan jeke jaǵdailar kezdesedi, árine. Siz, mysaly, dosyńyzben janjaldasyp qalsańyz, muny álimjettik dep aitýǵa kele me? Joq", - dedi Jaqsylyqov májilis kýlýarynda jýrnalisterdiń suraǵyna jaýap berip.
Aitýynsha, qazir sarbazdar nebári bir jyl ǵana áskerde bolady. On eki aidan keiin úiine oralady. Al keńes zamanynda jastar eki-úsh jyl áskeri boryshyn óteitin.
"Qazir bir jyl merzim týraly sóz bolyp otyr. 18-19 jastaǵy bozbalalar arasynda qandai álimjettik bolýy múmkin?! Bir-birimen sózge kelip, kerisip qalady. Óitkeni bul taza erler ujymy", - deidi ministr.
Jaqsylyqov búkil qoǵam jastar tárbiesimen ainalysýy qajet dep sanaidy.
"Qazir keshki ýaqytta úiden shyqsańyz, jastardyń ne istep júrgenin kóresiz. Sondyqtan, eń aldymen, jastardyń tárbiesi jaily aitaiyq. Jastardy tárbieleý - bárimizdiń mindetimiz", - dedi ol.
Sońǵy kezderi Qazaqstanda áskerge shaqyrylǵan sarbazdar arasynda sýitsid jiilep ketti. Bul problemaǵa prezident Qasym-Jomart Toqaev ta nazar aýdardy. Memleket basshysy mundai qaiǵyly oqiǵalardy boldyrmaý úshin arnaiy komissiia qurýdy tapsyrdy.
Oǵan Qaýipsizdik keńesiniń hatshysy Ǵizat Nurdáýletov jetekshilik etedi. Osyndai jaǵdaiǵa jol bergen ofitserler jazalanady.
