Videodan kadr: Astana arnasy
Koreiaǵa jumys isteýge ketken otandasymyz 1,5 jyldan beri tabylmai jatyr. Shyǵys Qazaqstan oblysynyń týmasy alǵashqy kezde anasymen turaqty habarlasyp turǵan. Tapqan tabysyn jiberip otyrǵan. Endi ata-ana qyzynan habar ala almai júrgenin aitady, - dep habarlaidy "Astana" telearnasy.
Shyǵys Qazaqstan oblysynyń týmasy Albina Kabdýldina esepshi mamandyǵyn meńgerip, saýda úiinde satýshy bolyp jumys isteidi. Joldasy qaitys bolyp, 13 jastaǵy jalǵyz qyzymen qalǵan. Anasyna baspana alyp bermek nietpen tabysy kóp jumys izdeidi. Osy maqsatta 2019 jyly Koreiaǵa ketedi.
"Únemi bailanysta boldy. Bir emes, eki ret shyǵatyn. Jumys ornyn kórsetetin. Qaida istep jatqanyn, zaýyttaryn kórsetetin. Pandemiia ýaqytynda vizasymen problema boldy. Sol kezde shyǵa almai qaldym dedi. Biraq bastyqtary kerek zatty ákep beredi dedi. Pýsan, Seýl degen qalalardy aýystyryp otyrdy jumys tabý úshin. Úige qait degende: "Úige barǵanda ne isteimin? Tabys joq" deitin. Áiteýir kelgennen keiin birdeńesin jinap, terip múmkin birdeńe alamyz dep sondai nietpen ketti ǵoi", - deidi anasy.
35 jastaǵy Albinamen bailanys 2021 jyldyń 13 maýsymynda úzildi. Ózin qoiarǵa jer tappaǵan ana qyzyn taýyp beremin degen ailakerlerge tap bolyp, 10 millionǵa jýyq aqsha bergen.
"Mine, bir jarym jyl boldy. Men bilmeimin qaida ekenin...barlyq múmkindikti jasadyq. Dúnieniń aqshasyn jiberdik. Bir áiel bolysamyn dep otyrǵyzyp ketti úlken aqshaǵa. Sóitse alaiaq bop shyqty. Endi bilmeimin kimge senýge bolady? Qalai izdeýge bolady? Men bilmeimin", - deidi Aigúl Bolsaeva.
Anasynyń baspaǵan tabaldyryǵy, ashpaǵan esigi qalmady. Zańsyz migranttardyń quqyǵyn qorǵaityn "Koreia kómek" qaiyrymdylyq qorynyń múshesi Samat Ahmetov te otandasymyzdy izdeýge atsalysyp keledi.
Telearna málimetinshe, qazirgi tańda Ońtústik Koreiada 37 myńnan astam qazaqstandyq bar. Olardyń 11 myńy zańsyz migrant. Jylyna sol elde iz-túzsiz joǵalatyn jergilikti jáne shetel azamattarynyń sany 11 myńnan asady.
"30 kúnnen artyq júretin bolsa, avtomatty túrde zańsyz bop eseptelinedi. Naqtysyn aitqanda, baryp jatqan adamdardyń 80-90 protsenti sol jaqta jumysqa qalyp qoiyp jatqan adamdar. Ol jaqtaǵy ailyqty tolyq aita almaimyn endi. Biraq bizdiń estýimiz boiynsha 800-900 myń teńgeden bastalady", - deidi Koreiaǵa keńes berý ortalyǵynyń basshysy Islambek Áliev.
