Juma kúni Ońtústik Koreia koronavirýs juqtyrǵan 518 jańa jaǵdai tirkeldi. Eldegi aýrý juqtyrǵandardyń jalpy sany 6284 adamǵa jetti, dep habarlaidy Yonhap agenttigi.
Virýs juqtyrǵan jańa jaǵdailardyń kópshiligi virýs oshaǵyna ainalǵan eldiń ońtústik-shyǵysyndaǵy Tegý qalasy men Soltústik Kionsando provintsiiasynda anyqtalǵan.
Korei aýrýlardy baqylaý jáne aldyn alý ortalyǵynyń (KCDC) málimetine sáikes, Ońtústik Koreiada ótken jyldyń sońynda Qytaida paida bolǵan jańa virýstan 42 adam kóz jumǵan. Olar - negizinen sozylmaly aýrýlary bar egde jastaǵy naýqastar.
Rastalǵan jaǵdailardyń 60 paiyzǵa jýyǵy 2,5 million halyq turatyn, úlkendigi jóninen eldiń tórtinshi qalasy Tegýdaǵy Sinchhondji (Shincheonji) dini sektasynyń filialymen bailanysty.
Bilik qaladaǵy virýstyń taralý deńgeiiniń artýyna alańdaýly.Mekditsinalyq mekemeler Tegýde azamattardy tekserýden ótkizýdi bastady.
Korei aýrýlardy baqylaý jáne aldyn alý ortalyǵynyń málimetinshe, beisenbi kúni anyqtalǵan 518 jańa jaǵdaidyń 367-si Tegýda, 123-i kórshiles Soltústik Kionsando provintsiiasynda tirkelgen.
Sondai-aq, Seýlde virýs juqtyrǵan taǵy eki jaǵdai týraly habarlandy.
Sońǵy málimetter boiynsha, 100 el men aýmaq koronavirýstyń taralý qaýpine bailanysty Ońtústik Koreia turǵyndary úshin karantin rejimin kúsheitýdi nemese kirýge shekteý engizýdi josparlap otyr.
