Sidnei Olimpiada oiyndarynyń kúmis júldegeri dańqty palýan Islam Bairamýkov Qordai aýdany turǵyndaryn birlik pen yntymaqqa shaqyrdy, dep habarlaidy QazAqparat.
«El bolǵannan keiin mundai jaittar bolyp turady. Biraq ony aqsaqaldar alqasynyń aralasýy arqyly, zańdy túrde ǵana jaqsylyqpen sheshilýi tiis dep esepteimin. Muny tez arada sheshý kerek. Áitpese, bireýdiń múlkin qiratyp, úiin órtep jiberý esh jaqsylyqqa aparmaidy. Elimizdiń tatýlyǵyn, birligin saqtaý úshin kúsh salý qajet. Jas emespiz, ómirden alǵan azdy-kópti tájiribemiz bar. Alla Taǵala - meiirimdi, adam balasynyń barlyq kúnásin keshiredi. Al onyń aldynda biz kimbiz, bir-birimizdi keshire almaityndai? Qordai aýdany turǵyndaryn birlik pen yntymaqqa shaqyramyn», - dedi ol.
Dańqty palýan Qordai aýdanynda oryn alǵan jaǵdaiǵa kináli adamdar zańdy túrde jazalanýy tiistigin basa aitty.
«Búginde elimiz sporttan bolsyn, saiasattan bolsyn álemge tanymal elge ainaldy. Bul baǵytta áli de kóptegen is-shara atqarylyp jatyr. Biraq, mundai keleńsizdikke jol bermeýimiz kerek. Árine, ár ulttyń namysy bar. Namysqa tietin de jaittardyń oryn alatyndyǵy jasyryn emes. Biraq kináli adamdy anyqtap jazalaý kerek. Bul máseleni jaqsylyqpen sheshý qajet», - dedi Islam Bairamýkov.
Buǵan deiin Jambyl oblysynyń Qordai aýdanyndaǵy Masanchi aýylynyń turǵyndary arasynda jappai tóbeles bolǵanyn habarlaǵan bolatynbyz.
Kóp ýaqyt ótpei Prezident Qasym-Jomart Toqaev osy oqiǵaǵa qatysty pikir bildirdi.
«Jambyl oblysy Qordai aýdanynda buzaqylyq sipattaǵy jappai tóbeles boldy. Ony arandatýshylar óz paidasyna qoldanbaq bolǵan. Politsiia jaǵdaidy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady», dep jazdy Qasym-Jomart Toqaev Twitter-degi paraqshasynda.
Al búgin Memleket basshysy Jambyl oblysyndaǵy oqiǵaǵa bailanysty málimdeme jasady.
