Elordada etnosaiasattyń ózekti máseleleri týraly dóńgelek ústel bastaldy, dep habarlaidy QazAqparat.
QR Prezidenti Ákimshiligi Basshysynyń birinshi orynbasary Máýlen Áshimbaevtyń aitýynsha, elimizde etnosaralyq qarym-qatynas pen qoǵamdyq kelisimdi saqtaý máselesi - memlekettik saiasattyń negizgi basymdyqtarynyń biri.
«Bul baǵytta sońǵy jyldary kóp jumys jasaldy. Degenmen jaqynda Qordai aýdanynda bolǵan qaiǵyly oqiǵalar osy salada qordalanǵan máselelerdiń bar ekenin de kórsetti. Sondyqtan, elimizde osyndai jaǵdailar qaitalanbaýy úshin kerekti barlyq sharalardy júzege asyrýymyz kerek. Prezidentimiz Qasym-Jomart Toqaevtyń tiisti tapsyrmasy bar. Memlekettik organdar osy baǵyttarda jumys istep jatyr», - dedi M. Áshimbaev dóńgelek ústeldiń ashylýynda.
Bul jumys tiimdi bolýy úshin eń aldymen osy oqiǵalarǵa, jalpy etnosaiasatqa obektivti saraptaý jasalýy kerek.
«Bul jaǵdaiǵa qandai faktorlar yqpal etti? Áleýmettik máselelerdiń róli qandai boldy? Qylmystyq toptardyń áreketi me? Memlekettik saiasattyń qai jerinde olqylyqtar bar? Aldyn alý jumystarynda qandai suraqtarǵa basymdyq berýimiz kerek? Jergilikti jáne ortalyq memorgandardyń jumysynyń tiimdiligin taldaý qajet. Qoǵamdyq institýttardyń, Qazaqstan halqy Assambleiasy qyzmetiniń tiimdiligin, ári qarai qalai damytý qajettigin túsiný kerek», - dedi ol.
Sonymen birge, Máýlen Áshimbaev elimizdiń etnosaiasatyn júzege asyrýda múddeli taraptarmen birlese jumys isteýdi usyndy.
«Etnosaralyq qarym-qatynastar salasyndaǵy memlekettik saiasattyń tiimdiligi bizdiń durys diskýssiia quryp, qajetti sharalardy qabyldaýymyzǵa tikelei bailanysty. Biz, Prezident Ákimshiligi bul talqylaýǵa daiynbyz, ashyq dialogqa, azamattyq qoǵam institýttarymen jáne múddeli azamattarmen birlese jumys isteýge ázirmiz. Bul - Memleket basshysynyń «Halyq únine qulaq asatyn memleket» tujyrymdamasyn júzege asyrý kórsetkishteriniń biri. Aldaǵy ýaqytta elimizdiń etnosaiasatyn júzege asyrý aiasynda barlyq múddeli taraptarmen, uiymdarymen jáne naqty sarapshylarmen etene jumys isteýge daiynbyz», - dedi M. Áshimbaev.
