Densaýlyq saqtaý vitse-ministri Lázzat Aqtaeva Qordaidaǵy qaqtyǵys saldarynan 165 adamnyń zardap shekkenin málim etti, dep habarlaidy QazAqparat.
«9 aqpan saǵat 11.00-degi málimet boiynsha tóbeles saldarynan 165 adam zardap shekti. Olardyń bári meditsinalyq kómek alýǵa kelgen. Turǵylyqty jeri boiynsha meditsinalyq uiymdarǵa - 140 adam, Qyrǵyzstandaǵy meditsinalyq uiymǵa - 25 adam júgingen. Aýrýhanaǵa júgingenderdiń ishinde 115 adamǵa ambýlatoriialyq em jasaldy. Iaǵni, ambýlatoriialyq kómek degenimiz - táýlik boiy baqylaýdy qajet etpeitin em túri», - dedi Lázzat Aqtaev OKQ-da ótken baspasóz máslihatynda.
Onyń aitýyna qaraǵanda, jalpy 50 adam, onyń ishinde 40 adam - Qazaqstannyń, 10 adam - Qyrǵyzstannyń aýrýhanalaryna jatqyzylǵan.
«Qazaqstandaǵy aýrýhanaǵa jatqyzylǵandardyń ishinde turaqty aýyr jaǵdaida 30 adam, al asa aýyr jaǵdaida 8 adam bar. Qaitys bolǵandardyń sany – 10. Oqiǵa ornynda 8, al taǵy 2 adam meditsinalyq mekemede qaitys boldy. Qazirgi tańda áli 8 adam jansaqtaý bóliminde jatyr.
Oqiǵa kezinde 14 jedel járdem kóligi jumyldyrylǵan. Onyń eń alǵashqysy toǵyz minýttyń ishinde jetken. Sonymen qatar sanaviatsiia brigadasy da tartyldy. Eki tikushaqtyń kómegimen zardap shekken aýyr jaǵdaidaǵy eki adam Almatyǵa jetkizildi. Olar Almaty qalasyndaǵy №7 klinikalyq aýrýhanaǵa jatqyzyldy. Tórt adam kóliktermen jetkizilip, ekeýi - qalalyq tórtinshi aýrýhanaǵa, bireýi – jedel meditsinalyq kómek aýrýhanasyna, qalǵan bireýi – Almatydaǵy kópqyzmetti №6 klinikalyq aýrýhanaǵa jatqyzyldy», - dedi Lázzat Aqtaeva.
Vitse-ministr zardap shekkenderdi emdeýge bilikti dárigerlerdiń tartylǵanyn aityp ótti.
