Qordaidaǵy biologiialyq qaýipsizdik máselelerin ǵylymi-zertteý institýtynda koronavirýsqa qarsy vaktsina ázirlenýde, dep habarlaidy "Ult aqparat" Jambyl oblysy ákiminiń baspasóz qyzmetine silteme jasap.
Jambyl oblysynyń ákimi Berdibek Saparbaev Qordaidaǵy jumys sapary barysynda aýdan aýmaǵyndaǵy biologiialyq qaýipsizdik máselelerin ǵylymi-zertteý institýtyna da arnaiy at basyn burdy. Koronavirýs pandemiiasymen kúrestiń qazirgi jaǵdaiynda strategiialyq rejimdik obektiniń jumysy erekshe mańyzǵa ie.
Ǵalymdar densaýlyq saqtaý jáne veterinariia salasyndaǵy túrli infektsiialarmen kúreske zor úles qosyp keledi, jyl saiyn qaýipti jáne asa qaýipti infektsiialarǵa qarsy 27 millionnan astam ekpeni jetkizedi. Olar Dúniejúzilik densaýlyq saqtaý uiymymen, AQSh aýrýlardyń aldyn alý jáne baqylaý ortalyǵymen, Halyqaralyq Vena ýniversitetimen jáne basqa da bedeldi uiymdarmen tyǵyz bailanysta jumys isteidi.
Zertteý institýty sheteldik analogtarmen salystyrǵanda úsh ese arzan bolatyn nodýliarlyq dermatitke qarsy vaktsinany ázirledi. Ony engizý nátijesinde respýblikalyq biýdjettiń únemdelýi eki milliard teńgeni qurady. Institýt óz ónimderin ónerkásiptik aýqymda óndirse, kóp paida ákeletin edi, sondyqtan jylyna vaktsinalardyń 60 million dozasyna deiin qýattylyǵymen immýnobiologiialyq preparattar shyǵaratyn biofarmatsevtikalyq zaýyt salý qajettiligi týyndaýda.
Atalǵan joba quny - 3,5 milliard teńge. Jańa óndiristi iske qosý úshin qajetti joǵary bilikti kadrlar, mikroorganizmderdiń qaýipti jáne asa qaýipti shtammdarynyń biregei kollektsiiasy, ǵylymi infraqurylym, ziiatkerlik menshik sekildi jaǵdailar jetkilikti. Sonymen qatar, ǵalymdar búginde koronavirýsqa qarsy vaktsina daiyndaýmen ainalysýda.
«Qazaqstan Prezidentiniń osyndai ǵylymi ortalyqtardy qoldaý týraly tapsyrmasy bar. Sońǵy oqiǵalar halyqtyń qaýipsizdigi men densaýlyǵy máselesin ǵana emes, olardyń qanshalyqty mańyzdy ekenin de kórsetti. Sizderdiń jumystaryńyz el ekonomikasynyń damýyna úlken úles qosady, kez kelgen ýaqytta týyndaýy múmkin ártúrli pandemiia zardaptaryn azaitady. Álem jahandanýda jáne qysqarýda, adamdar aýrýdyń eshkimdi aiamaitynyn túsindi. Bul jaǵdaida Qazaqstan jahandyq syn-qaterlerge jedel jaýap bere alatyn ózindik ǵylymi ortalyqtardyń júiesin qurýǵa tiis. Oblystyq bilik zaýyttyń qurylysyna mindetti túrde qoldaý kórsetedi. Másele muqiiat, jan-jaqty pysyqtaýdy talap etedi, biraq ol mindetti túrde oń sheshimin tabady», - dep atap ótti oblys ákimiB.Saparbaev.
