Qordai aýdany Gvardeisk qalashyǵyndaǵy Biologiialyq qaýipsizdik problemalary ǵylymi-zertteý institýty qyzmetkerlerine arnalyp salynǵan jalpy 180 páterlik 3 kópqabatty turǵyn úi paidalanýǵa berildi, - dep habarlaidy "Ult aqparat" Jambyl oblysy ákiminiń baspasóz qyzmetine silteme jasap.
El Táýelsizdiginiń 30 jyldyǵyna orai ótken páter kiltterin tapsyrý saltanatty sharasyna qatysqan oblys ákimi Berdibek Saparbaev qonys toi ielerin quttyqtap, ǵalym-mamandardyń, qurylysshylardyń eleýli eńbegin atap ótti.
"Jaqynda ǵana oblysymyzǵa jumys saparymen kelgen QR Prezidenti Qasym-Jomart Toqaev aitqandai, shyn máninde bul úlken jetistik. Elimiz úshin qajetti óndiris. Sizder Qazaqstandy álemge taǵy bir tanyttyńyzdar. Bizdiń elimizde de biotehnologiianyń damyǵanyn, joǵary bilikti ǵalymdardyń bar ekenin dáleldeńizder.
Shetelderde mundai óndiristi qurýǵa 3-4 jyl jumsalsa, biz toǵyz aidyń ishinde úlken zaýyt sala aldyq. Vaktsinamyz dúnie júzinde moiyndalyp jatyr.
Memleket basshysy ǵalymdarǵa, mamandarǵa barlyq qajetti jaǵdai jasaý, olardyń eshteńege alańdamai jumys isteýine, ǵylymmen ainalysýyna qolaily orta qalyptastyrý, baspanamen, balalaryn mektep jáne balabaqshamen kedergisiz qamtý, ýaqyttaryn tiimdi ótkizý boiynsha naqty tapsyrma bergen bolatyn. Sol tapsyrmanyń negizinde jalaqylaryńyz artty, sizderge arnalyp salynǵan 180 páterli turǵyn úiler búgin paidalanýǵa berilýde. Bul institýt pen zaýyt qyzmetkerlerin tolyǵymen baspanamen qamtýǵa múmkindik beredi.
Sizderdiń qajyrly eńbekterińizdiń arqasynda óndirilip jatqan otandyq vaktsinanyń koronavirýs indetine qarsy kúreske jáne halyqtyń densaýlyǵyn nyǵaitýǵa zor úles qosatynyna senemin", - degen aimaq basshysy qyzmetkerler men qurylysshylarǵa rizashylyǵyn jetkizdi.
Biologiialyq qaýipsizdik problemalary ǵylymi-zertteý institýtynyń bas direktory Kúnsulý Zakariia barynsha qoldaý kórsetip jatqan el, oblys basshylyǵyna, qurylysshylarǵa degen yqylasyn bildirdi.
"Oblys ákimi eki jylda otyz retten astam jumys saparymen kelip, bizdegi qurylys barysymen, máselelerimizben, jaǵdaiymyzben jii tanysyp otyrdy. Sonyń nátijesinde barlyq jumystar der kezinde ári sapaly oryndaldy.
Institýt qyzmetkerleri úshin barlyq qajetti jaǵdailar jasalýda. Atap aitar bolsaq, turǵyn úiler, balalar oiyn alańshalary, dene shynyqtyrý-saýyqtyrý kesheni salyndy. Talai jyldan beri institýt qyzmetkerlerin turǵyn úimen qamtamasyz etý máselesi alǵash ret sheshimin tapty. Elimizdiń jáne oblys basshylyǵyna úlken alǵysymyzdy bildiremiz!", - dei kele Kúnsulý Zakariia jumystardy sapaly ári joǵary deńgeide jalǵastyra beretindikterin jetkizdi.
Paidalanýǵa berilgen turǵyn úilerdegi páterler tolyǵymen turmysqa qajetti jihazdarmen jabdyqtalǵan, barlyq injenerlik jelilermen qamtylǵan.
Institýt jáne zaýyt qyzmetkerleri men olardyń balalary úshin 120 adamǵa arnalǵan dene shynyqtyrý-saýyqtyrý kesheni, oiyn alańshalary salynǵan.
