Qordai aýdanynyń politsiia qyzmetkerlerine qatysty zorlyq-zombylyqty tergeý aiaqtaldy, dep habarlady Bas prokýratýranyń baspasóz qyzmeti.
Baspasóz qyzmetiniń málimetterine qaraǵanda, 2020 jyldyń 7 aqpanynda Jambyl oblysy Qordai aýdany Sartóbe aýlynda jol politsiiasy qyzmetkerleriniń patrýldeý kezinde L.Voingýidiń basqarýyndaǵy «Honda Odissei» avtokóligi toqtatylǵan.
Kóliktiń tiisti qujattary bolmaǵandyqtan, L.Voingýiǵa politsiia bólimine barý usynylǵan.
Alaida, ol ofitserlerdiń talaptaryn oryndamai, úiine qarai bet alǵan jáne keiinnen aǵalary A. Voingýi jáne M. Voingýimen birlesip politsiia qyzmetkerlerine qarsy zorlyq-zombylyq jasaǵan.
Osy oqiǵanyń videosy buqaralyq aqparat quraldary men áleýmettik jelilerde taratyldy.
«Atalǵan fakti boiynsha Bas prokýratýranyń arnaiy prokýrorymen Qylmystyq kodekstiń 380-babynyń 1-bóligi (bilik ókiline qatysty kúsh qoldaný) boiynsha sotqa deiingi tergeý júrgizildi. Úsh aiyptalýshy óz kinálaryn tolyq moiyndap, tergeý sotymen qamaýǵa alyndy. Aǵymdaǵy jyldyń 14 aqpany kúni qylmystyq is aiyptaý aktisimen Qordai aýdandyq sotyna joldandy», - delingen Bas prokýratýranyń habarlamasynda.
