Qordai aýdanynda politsiia qyzmetkerleriniń zańdy talabyna baǵynbai qarsylyq tanytqan 3 adam 1,5 jyldan bas bostandyǵynan aiyryldy.
Bul týraly búgin Ortalyq kommýnikatsiialar qyzmetindegi brifingte QR Bas prokýrorynyń orynbasary Erlik Kenenbaev aitty, dep habarlaidy QazAqparat.
«Osy jyldyń 5 aqpanynda Qordai aýdanyna qarasty Sarytóbe aýylynda jol ústinde eki túrli ult ókilderiniń arasynda bolǵan jaǵdai kezinde qart adamǵa jaraqat keltirildi. Bul qylmys boiynsha 2 adamǵa kúdik keltirilip otyr. Onyń bireýi sot sanktsiiasymen qamaýǵa alynǵan. Jaqyn arada tergeý jumystary aiaqtalyp, isti sotqa joldaimyz», - dedi ol.
Sonymen qatar ol 7 aqpan kúni osy aýyl turǵyndarynyń biri «Honda odissei» markaly kóligimen politsiia qyzmetkerleriniń zańdy talabyna baǵynbai, úiine ketip qalǵan. Úiiniń janynda ol týystarymen birge politsiia qyzmetekerlerine kúsh qoldanǵan. Kúdiktiler birden ustalyp, sot sanktsiiasymen qamaýǵa alynǵan.
«Olardyń zańsyz áreketteri politsiia qyzmetkerleriniń jaýaptarymen ǵana emes, sonymen birge kýágerlerdiń uialy telefondaryna jazylǵan kóptegen beine jazbalarmen rastalady. Osy oqiǵany internet resrýstardaǵy beinerolikterden de kórýge bolady. Osy jyldyń 18 naýryzynda sot úkimimen 3 adam kináli dep tanylyp, sottaldy. Sot olardyń árqaisysyna 1,5 jyldan bas bostandyǵynan aiyrý jazasyn taǵaiyndady», - dedi Erlik Kenenbaev.
