Ishki ister ministrliginiń kóshi-qon komiteti kóptegen memleketter balada jeke tólqujat bolýyn talap etetinin málimdedi. Sondyqtan shetelge shyǵar aldynda ár balada jeke qujatynyń bolýyn pysyqtap alý qajet, dep habarlaidy QazAqparat vedomstvonyń baspasóz qyzmetine silteme jasap.
Elden tysqary shyqqan jaǵdaida balalardyń sýretin ata-anasynyń pasportyna jelimdeýdi alyp tastaý boiynsha zańnamaǵa túzetý engiziledi. Balada jeke pasport bolýyn kóptegen elder talap etedi, osyǵan bailanysty komitet aldaǵy ózgerister óte ózekti ekenin eske saldy.
«Qazir bul zań jobasy Parlament qaraýynda jatyr. Jeke pasport kóptegen elderdiń talaby ekenin eskere otyryp, balalarymen shetelge shyǵýdy josparlaǵan ata-analarǵa basqa eldiń shekarasyn kesip ótý úshin erterek pasport rásimdeý kerektigi eskertildi. Sonymen qatar, bul túzetý Memleket basshysy zańǵa qol qoiǵannan keiin ǵana engiziletinin túsindirdik» delingen habarlamada.
Osyndai túsindirmeler UQK Shekara qyzmetine jáne Syrtqy ister ministrligine joldandy.
HQO-da ata-analardyń pasportyna balasynyń sýretin jelimdeý máselesimen qabyldaý toqtatylǵan joq jáne sol qalypta júrgizilip jatyr.
«Ata-anasynyń pasportyna japsyrylǵan sýretpen kirgizetin jáne kirgizbeitin memleketter týraly ádette Syrtqy ister ministrligi habardar etedi. Sondyqtan qandai da bir elge jol júrer aldynda ol elge kirý tártibin diplomatiialyq ókildikterden aldyn ala bilip alý kerek» deidi komitet.
Sondai-aq, qazir IIM balalarǵa tólqujat berý úshin memlekettik bajdy azaitý máselesin pysyqtap jatyr.
