Foto: zhalagash-zharshysy.kz
Jýyrda depýtat Ashat Aimaǵambetov jýrnalsit Aikerim Esenálige bergen suhbatynda halyqtyq reforma jasaý úshin biliktegilerge minez keregin aitty.
Ol óz sózinde:
«Bastama jasap, onymen jumys isteý úshin úlken minez kerek. Mysaly, qazirgi ýaqytta osy máselemen jumys istep jatqan – Premer ministrdiń orynbasary Serik Jumanǵarin myrza. Bul halyqqa óte unamaityn reforma, shynyn aitý kerek. Budan úlken abyroi tabý qiyn. Biraq degenimen, osyndai unamaityn sheshimderge baratyn azamattar bolǵany biz úshin mańyzdy. Olar unasa da, unamasa da, elge kerek bolsa, qajet reformalar jasaý biledi. Osyndai mamandar kerek. Tek qana jaltaqtap otyratyn, tek ádemi suhbat bergim keledi, tek elge jaǵymdy bolyp kórinemin degen azamattar ókinishke qarai, Úkimette az emes. Ádemi slaidtar jasaidy, ádemi sóileidi, forýmdarǵa qatysady. Ábden mashyqtanyp alǵan. Ondai azamattardy qai jerden alatyn bolsaq ta az emes. Biraq men aitqandai, qiyn sheshimder men qiyn reformalarǵa bara alatyn, sol mindettemeni, barlyq jaýapkershilikti ózine ala alatyn azamattardy men qurmetteimin», – degen edi depýtat Ashat Aimaǵambetov.
Osy oraida Ult.kz tilshisi saiasattanýshy Samat Nurtazadan áriptesiniń oiyna qatysty pikirin surap kórdi. Ol óz sózinde kópshilik keide reforma túgili shyndyqty da qabyldamaitynyn aitty.
Foto: ashyq derekkózden
«Qarapaiym tilmen aitýǵa da bolady, ol – shyndyq. Keide kópshilik reforma túgili shyndyqty da qabyldamaidy. Sondyqtan da keibir adamdar qoǵamnyń estigisi keletin sózin aitqanda, ózderine bonýs jinap alady. Biraq shyndyq aitqan adam jaman atty bolady. Álýmettik jelide bolsyn, ómirde bolsyn solai. Sondyqtan Ashat Qanatulymen 100 paiyz kelisemin», – dedi Samat Nurtaza.
Sonymen birge, Samat Nurtaza salyq reformasyna qatysty kóp synǵa ushyryǵan Ulttyq ekonomika ministri Serik Jumaǵarindi mysalǵa keltirdi.
«Birinshiden, Serik Jumanǵarin óz isiniń mamany. Iá, keibir jaýaptary tik shyǵar, keibir jaýaptary múmkin qoǵamnyń bir bóligine unamaityn shyǵar. Biraq ol aqty – aq, qarany – qara dep aitady. Múmkin bireýge jumsartyp sóileitin, maida sóileitin, ótirik úmit beretin mamandar unaityn shyǵar. Biraq Serik Maqashuly, «mynaý bolmaidy», «mynaý bar, mynaý joq» dep aitady. Sondyqtan keibir adamdardyń tik minezin «óreskel» dep qabyldaitynyn men túsinip otyrmyn. Ondai negativ bolýy múmkin, sebebi biz bárine unai beretin dollar emespiz ǵoi. Men de bireýge unaimyn, bireýge unamaimyn. Sondyqtan kritika bolady, onyń bolǵany durys. Biz demokratiialy memleket, ashyq qoǵam quramyz dep jatyrmyz. Júz adamnyń barlyǵy birdei oilaýy mindetti emes», – deidi ol.
Samat Nurtaza Qazaqstanda bolsyn, basqa elderde bolsyn, barlyq reformaǵa birdei kóńili tolatyn adam tappaimyz dep esepteidi.
«Eń keremet degen memleketterdiń ózinde problema shyǵyp jatady. Árine, kóp nárse jasalyp jatyr, qoldan kelgenshe depýtattar ǵana emes, sonymen qatar, ministrler, ákimder, Prezident bastap, bári de jumys istep jatyr. Biraq problemalar bar, bári keremet dep ótirik aita almaimyz. Áleýmettik másele bolsyn, jalaqy, qymbatshylyq, páter máselesi, jylý sapasy, dárigerler, mektepter degen siiaqty, aita berseń, sóz kóp. Onyń barlyǵy aqyryndap jasalyp jatyr. Bolashaqta jasai beredi dep senemin», – dedi saiasattanýshy Samat Nurtaza.
