Qazaqstanda kóppáterli turǵyn úidi basqarýdyń jańa formasyna kóshý jumystary júrip jatyr. Bul týraly QR Indýstriia jáne infraqurylymdyq damý ministrligi qurylys jáne turǵyn úi-kommýnaldyq sharýashylyq isteri komiteti tóraǵasynyń orynbasary Erkebulan Daýylbaev aityp berdi, dep habarlaidy QazAqparat.
«2020 jyldyń basynan bastap «Keibir zańnamalyq aktilerge turǵyn úi-kommýnaldyq sharýashylyq máseleleri boiynsha ózgerister men tolyqtyrýlar engizý týraly» QR Zańy kúshine engen bolatyn. Memleket basshysynyń 2020 jyly 1 qyrkúiektegi «Qazaqstan Jańa naqty ahýalda: is-qimyl ýaqyty» Joldaýy aiasynda Úkimetke jáne ákimderge múlik ieleri birlestikteri institýtyn engizý jónindegi reformany iske asyrýdy qamtamasyz etý tapsyryldy», - dedi E.Daýylbaev Ortalyq kommýnikatsiialar qyzmetinde ótken baspasóz máslihatynda.
Reforma «bir úi – bir birlestik – bir esepshot» printsipi boiynsha «múlik ieleriniń birlestigi» kommertsiialyq emes uiymynyń jańa formasyn qurý jolymen basqarý organdarynyń qyzmetin retteýge baǵyttalǵan.
«Zańdy iske asyrýǵa qajetti normativtik quqyqtyq aktiler ázirlendi. Reformany júieli iske asyrý úshin jergilikti atqarýshy organdarda kóppáterli turǵyn úidi basqarýdyń jańa formalaryna ótý boiynsha Jol kartalary ázirlenip, ministrliktiń baqylaýynda tur. QR Ádilet ministrliginiń derekterine sáikes, biylǵy 22 aqpandaǵy jaǵdai boiynsha 1 735 jańa basqarý formasy qurylǵan (Múlik ieleri birlestigi - 695, Jai seriktestikter – 1 040). Olardyń basym bóligi Nur-Sultan jáne Almaty qalalarynda. Basqarýdyń jańa nysandaryn qurý paiyzynyń tómendigi jinalys ótkizýdi shekteitin karantin sharalarymen bailanysty ekeni sózsiz», - deidi spiker.
Onyń aitýynsha, turǵyn úi qatynastary salasyndaǵy qarqyndy ózgeristerge kóppáterli turǵyn úilerdi basqarý salasyndaǵy azamattardyń shaǵymdary túrtki bolǵan.
«Ásirese bul qyzmetterinde sheshim qabyldaý jáne qarajatty jumsaý jaǵynan ashyqtyqtyǵy joq «kópúili» páter ieleriniń kooperativterine (PIK), páter ieleriniń tutyný kooperativterine qatysty boldy. Sondyqtan páterlerdiń, turǵyn emes úi-jailar ieleriniń qarajattyń túsýi men jumsalýynyń ashyqtyǵyn qamtamasyz etý úshin óz úiinde múlik ieleri birlestigin nemese jai seriktestik qurý qajettigin túsinýi mańyzdy», - deidi E.Daýylbaev.
Bul rette basqarýdyń eski nysandary 2022 jyldyń 1 shildesine deiin óz qyzmetin jalǵastyrady. Osy merzim aiaqtalǵan soń Qazaqstan Respýblikasynyń zańnamasynda belgilengen tártippen joiý rásimin júrgizýi tiis.
