Qazaq ádebietiniń kórnekti ókili, belgili satirik, jýrnalist Kópen Ámirbek 73 jasqa qaraǵan shaǵynda baqilyq boldy. Bul týraly aqyn, Qazaqstan Jazýshylar odaǵynyń múshesi Serik Seiitman Facebook paraqshasynda habarlady.
"Kóńilderińizge kóp raqmet. Kópen aǵam bizdi tastap ketti...", - dep jazdy ol jelide.
Kópen Ámirbek 1950 jyly 29 naýryzda Ońtústik Qazaqstan oblysynyń Otyrar aýdanyna qarasty Eshkiqora eldi mekeninde dúniege kelgen.
Orta mektepti bitirgen soń, Otyrardaǵy halyq teatrynda eńbek ete bastaǵan. Keiinirek ál-Farabi atyndaǵy Qazaq ulttyq ýniversitetiniń jýrnalistika fakýltetine oqýǵa túsip, ony 1973 jyly támamdaidy. Sondai-aq, ol qiyr shyǵysta eki jyldyq áskeri partiia mektebinde oqyǵan. 1978 jyly Máskeýde, 1980 jyly Tashkentte ótken búkilodaqtyq jas syqaqshylar festivaline qatysyp, ázil-syqaq shyǵarmalary "Pravda" baspasynan shyqqan "Nadeisia i jdi", "Krohotnye zvezdy" atty orys tilindegi ujymdyq jinaqta jariialanǵan.
Ol saiasi satiralyq "Ara-Shmel" jýrnalynda ádebi qyzmetker, bólim meńgerýshisi, jaýapty hatshy, bas redaktor, ǵylymi-tehnikalyq "Bilim jáne eńbek" jýrnalynda jaýapty hatshy, "Qazaq ádebieti" gazetinde satira jáne iýmor bóliminiń meńgerýshisi, "Egemen Qazaqstan" gazetinde feleton bóliminiń meńgerýshisi, Qazaqstan Respýblikasy Bas prokýratýrasy men Joǵarǵy sotynda baspasóz hatshysy, Qazaq radiosynda bas redaktor bop qyzmet istegen.
Kópen Ámirbek "Qymyzhana", "Tamasha" oiyn-saýyq otaýynyń belsendi avtory retinde, sondai-aq, ózi qurǵan "Kópen kele jatyr!..." atty satiralyq teatrymen kórermenge keń tanylǵan. Onyń "Aty joq kitap", "Alyp", "Tilim qyshyp barady", "Qysyr áńgime", "Aýyzbastyryq", "Myń bir mysal", "Nemeneńe jetisip kúlesiń?", "Ózińdi tanisyń ba?", "Saidaǵy qoishydan saraidaǵy patshaǵa deiin" atty ázil-syqaq, parodiia kitaptary bar.
Ult portalynyń ujymy qazaq jurtyna qadirli bolǵan kórnekti qalamgerdiń mezgilsiz dúnieden ozýyna bailanysty onyń otbasy men týǵan-týystaryna qaiǵyryp kóńil aitady.
Marqumnyń jatqan jeri jaily, topyraǵy torqa bolsyn. Peiishte nury shalqyp, Jaratqan artyndaǵy urpaǵyna uzaq ǵumyr bersin!
