Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine turǵyn úi qatynastary máseleleri boiynsha ózgerister men tolyqtyrýlar engizý týraly» zań jobasy maquldandy, dep habarlaidy QazAqparat tilshisi.
Zań jobasy bir top Parlament depýtattarynyń bastamashylyǵymen ázirlendi. Bul turǵyda «Turǵyn úi qatynastary týraly», «Memlekettik jastar saiasaty týraly», «QR Memlekettik nagradalar týraly» zańdaryna túzetýler eskerilgen.
«Usynylyp otyrǵan túzetýlerdiń negizgilerine toqtalsaq, kópbalaly otbasy uǵymyn «Neke (erli-zaiyptylyq) jáne otbasy týraly» kodeksine sáikes keltirý eskerilgen. Bul zańnamalyq aktiler arasyndaǵy qaishylyqty joiady. Ekinshiden, satyp alý quqynsyz jalǵa beriletin turǵyn úi uǵymyn engizý eskerilgen. Bul tabysy tómen halyqtyń áleýmettik osal toptaryna arnalǵan. Satyp alý quqynsyz jalǵa beriletin turǵyn úidiń turaqty kommýnaldyq qoryn qurýǵa mumkindik beredi», - dedi Májilis depýtaty Shavhat Ótemisov.
Budan bólek, «Altyn alqa», «Kúmis alqa» alǵandar nemese buryn «Batyr ana», sondai-aq birinshi jáne ekinshi dárejeli «Ana dańqy» ataǵyn alǵan kópbalaly analar men kópbalaly otbasylar sanaty úshin turǵyn úi alýǵa jeke kezek engizý qarastyrylǵan.
«Memlekettik josparlaý júiesiniń sheginde satyp alý quqynsyz jalǵa beriletin turǵyn úidi jáne onyń kólemin aiqyndaý qaralǵan. Bul norma kópbalaly otbasylardyń turǵyn úi máselesin sheshýge, qarajatty tikelei jáne maqsatty joldaýǵa negiz beredi. Osynyń arqasynda, jalǵa beriletin turǵyn úidiń kólemi ósedi dep kútýdemiz», - dep naqtylady Sh. Ótemisov.
«Qazirgi ýaqytta kezekte turǵan kópbalaly otbasylardyń sany 31 725-ke jetti. Kópbalaly otbasylardy jalǵa beriletin turǵyn úimen qamtamasyz etý maqsatynda «Nurly jer» baǵdarlamasy boiynsha jyl saiyn 50 mlrd teńge qarajat bólinetin bolady. Osynyń arqasynda jylyna keminde 6 myń páter tapsyrylady», - dedi depýtat.
