QR Parlamentiniń Májilisi depýtattar bastamashylyq jasaǵan «Keibir zańnamalyq aktilerge ana men bala máseleleri boiynsha ózgerister men tolyqtyrýlar engizý týraly» zań jobasyn jumysqa qabyldady. Qujat 7-eýden kóp balalary bar kópbalaly otbasylardaǵy árbir balaǵa qosymsha 4 ailyq eseptik kórsetkish mólsherinde tólem taǵaiyndaýdy kózdeidi, dep jazady "Ult aqparat" Eńbek jáne halyqty áleýmettik qorǵaý ministrligine silteme jasap.
Buǵan deiin habarlanǵandai, 2020 jylǵy 1 qańtardan bastap Qazaqstanda 4 jáne odan da kóp kámeletke tolmaǵan nemese 23 jasqa deiingi kúndizgi oqý bóliminde oqityn stýdent balalary bar kópbalaly otbasylarǵa jańa memlekettik járdemaqy engizildi. Atalǵan memlekettik járdemaqy otbasynyń tabysyna qaramastan saralanǵan mólsherde taǵaiyndalady jáne tólenedi: 4 balaǵa – 42 496 teńge; 5 balaǵa – 53 127 teńge; 6 balaǵa – 63 757 teńge; 7 jáne odan da kóp balaǵa – 74 388 teńge.
Halyq qalaýlylary kópbalaly otbasylarǵa áleýmettik qoldaý kórsetý kezinde ádilettilikti qamtamasyz etý maqsatynda zańnamaǵa túzetýler engizý týraly bastama kóterdi. Eger qazir járdemaqynyń eń joǵary mólsheri 74,4 myń teńge bolsa, zań qabyldanǵan jaǵdaida 7-eýden kóp balalary bar otbasylarǵa kelesi mólsherde járdemaqy taǵaiyndalady:
- 8 balaǵa – 84 832 teńge;
- 9 balaǵa – 95 436 teńge;
- 10 balaǵa – 106 040 teńge;
- 11 balaǵa – 116 644 teńge;
- 12 balaǵa – 127 248 teńge;
- 13 balaǵa – 137 852 teńge;
- 14 balaǵa – 148 456 teńge.
Járdemaqynyń eń joǵary mólsheri Soltústik Qazaqstan oblysyndaǵy 15 balasy bar bir otbasy úshin esepteldi, ol otbasy 159 060 teńge alatyn bolady (járdemaqynyń osy túrin taǵaiyndaýdyń qoldanystaǵy júiesi boiynsha bul otbasy 74,4 myń teńge kóleminde járdemaqy alady).
Járdemaqynyń kóterilýi 2 451 otbasyna áser etedi. Onyń ishinde 8 balasy bar – 1 501, 9 balasy bar – 729, 10 balasy bar – 168, 11 balasy bar – 35, 12 balasy bar – 7, 13 balasy bar – 6, 14 balasy bar – 4, 15 balasy bar – 1 otbasy bar.
Búgingi kúnge járdemaqy 392 myń otbasyna taǵaiyndaldy. Jalpy alǵanda, kópbalaly otbasylarǵa memlekettik járdemaqy tóleý úshin 2020 jyly biýdjette 177,6 mlrd teńge kózdelgen.
Esterińizge sala keteiik, táýelsizdik jyldary Qazaqstanda ana men balany qoldaýdyń ulttyq modeli quryldy, ol 8 memlekettik járdemaqy men 3 tólem túrin qamtidy. Jalpy, osy maqsattarǵa 2020 jyly 682,9 mlrd teńge kózdelgen.
