Elimizde kópbalaly analarǵa arnalǵan temirjol jeńildik kartasy ázirlenedi. Bul týraly QR Indýstriia jáne infraqurylymdyq damý ministrliginiń keńeitilgen alqa májilisinde aityldy, dep habarlaidy QazAqparat.
«Ótken jyly jolaýshy vagondary parkin jańartý jáne bilet jetispeýshiligin joiý maqsatynda Mańǵystaý-Almaty, Nur-Sultan-Atyraý, Nur-Sultan-Saryaǵash, Almaty-Atyraý, Mańǵystaý-Almaty jáne Nur-Sultan-Saryaǵash baǵyttaryna 109 vagon satyp alyndy», - deidi QR Indýstriia jáne infraqurylymdyq damý vitse-ministri Berik Qamaliev.
Ol 2019 jyly jolaýshylar qujattary tolyq elektrondy júiege kóshkenin atap ótti.
«Múmkindigi shekteýli jandarǵa 50% jeńildigi bar tarifter usynyldy. Bolashaqta bul baǵyttaǵy jumys jalǵasyn taýyp, kópbalaly analarǵa arnalǵan jeńildik kartasy jasalady», - deidi ol.
Ol «Nurly jol» memlekettik baǵdarlamasy aiasynda vagondar parkin jańartý jumysy jalǵasyn tabatynyn aitty.
«2025 jylǵa deiin 600 jolaýshy vagonyn alý josparlanǵan», - deidi vitse-ministr.
