Kópbalaly Meiramgúl Muqaeva Panfilov aýdandyq aýrýhananyń provizorlyq bólimde aýyryp jatqan naýqastarǵa tegin saýmal ákelýde, - dep habarlaidy "Ult aqparat".
Almaty oblysyndaǵy Panfilov aýdanyndaǵy Sholaqai aýylynyń turǵyny Meiramgúl Muqaeva kúnde tańerteń aýrýhanaǵa 10-15 litr saýmal jetkizedi. Budan bólek saýynshy apanyń úiinen saýmal ishetinderdiń de qarasy kóp.
«Qazir elimiz qiyn kezdi bastan ótkizip jatyr. Jerlesterim, jaqyndarym aýryp jatqanda meniń qolymnan keletin kómegim osy. Saýmal barlyq aýrýǵa shipa. Sondyqtan aýrýhanaǵa kómek eteiin dep sheshtim», - deidi kópbalaly ana.
Al, aýdandyq bas dáriger Tóleý Sarpekov saýmaldyń naýqastarǵa paidasy bar ekenin aitady.
«Qazir saýmal kelgen boida emdelýshilerge normamen berip jatyrmyz. Osy oraida Meiramgúl apamyzǵa aýrýhana ujymy atynan alǵys bildiremin», - dedi ol.
1964 jyldan beri bie bailap, saýmalynyń emdik qasietin paidalanyp kele jatqan saýynshy bes bala tárbielep, nemerelerine jylqy malynyń paidasyn úiretýmen keledi.
