Koronavirýs indetiniń ekinshi tolqynynan qalai ótetindigimiz ózimizdiń is-áreketimizge bailanysty. Mundai pikirdi QR Parlamenti Májilisiniń depýtaty Pavel Kazantsev bildirdi, dep habarlaidy QazAqparat.
«Karantinniń jeńildetilýmen qatar belgili bir qaýipterdiń kúrdelene túsýi qatar júredi. Koronavirýsqa qatysty bul qaýipter memlekettik qurylymǵa ne bolmasa aýrýhanalardaǵy tósek-orynǵa emes, adamnyń mentalitetine, adamdardyń baiyppen nemese júrdim-bardym qaraýyna, elimizde týyndaǵan ortaq problemaǵa adami birige bilýine bailanysty. Dál osy deńgeide, koronavirýsqa qatysty qazirgi jaǵdaida bul úlken qaýip týyndaidy»,- dedi ol.
Osy rette Májilis depýtaty qaýipti dertti juqtyryp almaý adamnyń ózine jáne tártibine bailanysty ekendigin aitqan Elbasynyń úndeýine tolyq qosylatyndyǵyn bildirdi.
«Elbasy bizge adamdar tártipke, ózin-ózi oqshaýlaýǵa, bailanystardy qysqartýǵa jaýapkershilikpen qaraǵan elderde adamdar narazylyq tanytatyn, maska taǵýǵa májbúrleitin elderge qaraǵanda protsestiń jeńil ótetindigin kórsetip berdi. Elbasy úndeýi der ýaqytynda jasalyp otyr ári óte mańyzdy. Túptep kelgende árbir adam bul sózderdi jete túsinýi qajet. Indet juqtyryp, ózgelerge taratpaý úshin ózińe, ózińdi qorshaǵan ortaǵa jaýapkershilikpen qaraǵan jón», - dedi Májilis depýtaty.
Pavel Kazantsevtiń aitýynsha, adamdardyń barlyǵy koronavirýs indetiniń ekinshi tolqyny oryn alatyndyǵyn túsinip otyr. Al onyń aýyr álde jeńil ótetindigi bul problemaǵa adamdardyń baiyppen qaraýyna bailanysty.
«Koronavirýs indetiniń ekinshi tolqynynan qalai ótetindigimiz ózimizge jáne tártibimizge, is-áreketterimizge bailanysty», - dedi ol.
