«Qazaqstan Respýblikasynyń keibir zańnamalyq aktilerine turǵyn úi-kommýnaldyq sharýashylyq máseleleri boiynsha ózgerister men tolyqtyrýlar engizý týraly» QR Zańy saladaǵy kóptegen máselelerdi sheshedi.
Sonyń biri kóp páterli turǵyn úilerdi kondominiým nysany retinde tirkeý tártibi rettelip, ońailatylady.
Páter ieleri kooperativteri basshylarynyń turǵyndarǵa ortaq múlikti olardyń kelisiminsiz satyp jiberýi nemese jalǵa bergeni týraly azamattar tarapynan aryz-shaǵymdar jii aitylyp keldi. Endi kúshine engen jańa zań boiynsha mundai olqylyqtarǵa jol bermeýge bolady. Ol úshin ne isteý kerek?
Eń aldymen, kóp páterli turǵyn úilerdi kondominiým nysany retinde tirkeý qajet. Jáne onda jer ýchaskesin qosa alǵanda úidiń jalpy aýdany, ortaq múliktiń quramy, árbir páter men turǵyn emes úi-jailardyń úlesi mólsheri, jekemenshiktegi páterler men turǵyn emes úi-jailardyń aýdany anyq kórsetilýi tiis.
Kondominiýmdy tirkeý arqyly jalpyǵa ortaq múlikke degen quqyqtary zańdyq turǵydan bekitilip, ony basqarýǵa tikelei qatysa alady. Memlekettik tirkeý úshin keminde 2 adamnan turatyn bastamashy toptyń ótinishi kerek.
Zań boiynsha kondominiým nysany jalpy múliginiń bir bóligin satýǵa nemese jalǵa berýge tyiym salynady. Tiisti sheshim turǵyndardyń jinalysynda qabyldanýy kerek.
Keibir qurylys kompaniialary nemese basqarýshy kompaniialar úidi kondominiým retinde tirkemei turyp, onyń bólikterin, iaǵni jertólelerin, baspaldaq alańdaryn nemese irgelerin satyp jiberedi. Zań boiynsha mundai jaǵdailardyń aldyn alý úshin kondominiým aýdanyn endi úidi josparlaý kezinde-aq anyqtap alady. Oǵan qosa, paidalanýǵa qabyldanǵan kóp pátárli turǵyn úidiń kondominiým nysanyn memlekettik tirkeý mindeti úidi salýshy kompaniiaǵa júkteledi.
Eger múlik ieleri úi mańyndaǵy jer ýchaskesin jalpy múlik quramyna kirgizýdi qalasa, jinalysta tiisti sheshim qabyldap, jergilikti atqarýshy organǵa ótinish bere alady. Olai bolmaǵan jaǵdaida jer memlekettik menshikte bolyp, ony kútip-saqtaý shyǵyny biýdjet esebinen iske asyrylady.
Taǵy bir mańyzdy másele, kondominiým nysany retinde tirkeý jalpy múlikti basqaryp, paidalanýǵa múmkindik beretinine qaramastan, qazirgi tańda turǵyndardyń oǵan qyzyǵýshylyǵy tómen bolyp otyr. Óitkeni, kóp jaǵdaida úidiń tehnikalyq tólqujaty, jer ýchaskesiniń aktisi degen siiaqty qujattary bolmaidy ári tirkeý sharasy kúrdeli. Nátijesinde qazir elimizdegi 78 myńnan astam kóp páterli turǵyn úidiń nebári 21 myńy kondominiým nysany retinde tirkelgen.
Endi azamattarǵa qolaily bolýy úshin kondominiým nysanynyń ortaq múligin anyqtai otyryp, kóp páterli turǵyn úilerdi memlekettik tehnikalyq zertteý, memlekettik tirkeýge qajetti qujattardy usyný mindeti jergilikti atqarýshy organdarǵa júktelip, biýdjet esebinen iske asyrylady.
Sonymen, kóp páterli turǵyn úilerdiń kondominiýmyn tirkeý sharasy ońailatyldy. Ol úshin eki menshik iesinen ótinish jetkilikti. Nysandy tirkeý sharasyn avtomattandyryp, merzimin 1 kúnge deiin qysqartý qarastyrylǵan. Quqyq belgileýshi qujattardyń notarialdyq rastalǵan qujattaryn usyný talaby alyp tastaldy.
