5 aqpanda Nur-Sultan qalasyndaǵy dámhanalardyń birinde kóp balaly analar byltyr órtten qaza bolǵan bes sábige arnap, as berdi. Oǵan júzge jýyq adam jinaldy. Arasynda ákimdik ókilderi de boldy.
Analardyń aitýynsha, imam shaqyryp, quran oqytýǵa qajetti shyǵyndy ózderi kótergen. Árkim jaǵdaiyna qarai 500,1000, 2000 myń teńgeden qosylǵan.
- Byltyr úlken qaiǵy boldy. Ony umytýǵa haqymyz joq dep oilaimyn. Sondyqtan shydai almai, analar bolyp jinalyp, shyn yqylaspen quran baǵyshtaiyq dep niet ettik. Aitýǵa da uiat shyǵar, biraq bul oqiǵadan keiin halyq oianyp, quqyqtaryn talap ete bastady, járdemaqyǵa, ataýly áleýmettik kómekke qol jetkizdi. Bul oqiǵany eshqashan umytpaýymyz kerek, - dedi eske alý sharasyn uiymdastyrýshylardyń biri Aijamal Sareeva.
Ótken jyly 4 aqpanǵa qaraǵan túni astana mańyndaǵy Kóktal-1 yqshamaýdanynda kómirmen jylynatyn jer úiden órt shyǵyp, bir otbasynyń bes qyzy qaza bolǵan. Qaiǵyly oqiǵa qazaqstandyqtardyń memlekettik áleýmettik saiasatqa qatysty ashý-yzasyn týǵyzdy.
Nur-Sultan men óńirlerdegi kópbalaly analar áleýmettik qoldaýdyń jetkiliksizdigin aityp, narazylyqqa shyqty. Keiinirek Úkimet kóp balaly otbasylarǵa beriletin áleýmettik kómek túrlerin kóbeitken.
El astanasynda bolǵan qaiǵyly oqiǵadan keiin týra bir jyldan soń, uqsas jaǵdai Almaty túbindegi aýylda qaitalandy. Aqpannyń 3-i kúni Óstemir aýylynda bolǵan órtten úsh jáne tórt jastaǵy eki bala qaza tapty. Ata-anasy bul kezde úide bolmaǵan: ákesi qalaǵa jumys izdeýge, al anasy uly men qyzyn syrtynan jaýyp, dúkenge ketken.
