Májilis tóraǵasy Erlan Qoshanov jańadan qurylǵan Qoǵamdyq palatanyń quramyna oppozitsiia ókilderin usyndy, dep habarlaidy dep habarlaidy Ulysmedia.kz.
«Meniń oiymsha, búgin biz talqylap jatqan másele – óte mańyzdy másele. Bul keibir depýtattar aitqandai, «qoishyny kóbeitý» emes. Bizge taǵy da bir qosymsha alań ashyldy. Prezident qyzý pikirtalastar kóshede emes, mitingterde emes, osy Májilis qabyrǵasynda bolýy kerektigin aitqanyn bilesizder. Sol úshin osy Palata qurylyp otyr. Qoǵamdyq palatanyń quramy kelesi aptada aitylady. Osy institýt aiasynda buǵan deiin Parlament qabyrǵasyndaǵy talqylaýlarǵa qatyspaǵan sarapshylar keledi. Búginge deiin mundai qoǵamdyq talqylaýlar bolǵan joq. Osy Palata aiasynda úlken talqylaýlar bolady degen úlken úmitim bar», - dedi Májilis spikeri.
Erlan Qoshanov Qoǵamdyq palata músheleri asa rezonansty degen zańdardyń jobasyn talqylaýǵa shaqyrylatynyn atap ótti. Aitýynsha, taiaýda jeke tulǵalardyń bankrottyǵy jóninde úlken zań keledi. Sondai-aq, Áleýmettik kodeks jobasy talqylanady. Otbasy institýtyn damytý týraly zań jobasy qaralady.
«Munyń bári – qoǵamda qyzý pikir týdyryp júrgen úlken máseleler. Biz sonyń bárimen keri bailanys ornatýymyz kerek. Azamattar kóshedegi mitingterge emes, osy jerge kelsin. Biz soǵan múmkindik bereiik», - dedi Erlan Qoshanov.
Onyń sózine qaraǵanda, qoǵammen osyndai fomatta keri bailanys ornatýdyń mańyzy zor.
«Búgingi tańda, ókinishke qarai, bizge aitylyp júrgen syn kóp. Shynymyzdy aitaiyq, «Zań shyǵarýshylar halyqtan alshaqtap ketken» degen túsinik bar. Iaǵni, halyq bir jaqta, qoǵam bir jaqta, zań bir jaqta jumys istep jatyr degen pikir bar. Sondyqtan Qoǵamdyq palatanyń basty maqsaty – neǵurlym ózekti, rezonansty máselelerdi birinshi oqylymǵa deiin qoǵamnyń talap-tilegi turǵysynan qarastyrý, basty erekshelik osy. Budan bylai rezonansty máselelerdi talqylaǵan kezde beinebailanys arqyly óńirlerdegi qoǵamdyq keńesterdi de qosýymyz kerek. Solar arqyly jergilikti azamattardyń pikirin eskere alamyz. Palatanyń quramy zańdardyń erekshelikterine, baǵyttaryna bailanysty ózgerip turady. Basym kópshiligi depýtattar emes, qoǵam belsendileri bolady. Múmkin konstrýktivti oppozitsiia deimiz, olardy da qatystyraiyq. Úkimettik emes sektordyń ókilderi de tartylady», - dedi Májilis tóraǵasy.
Aita keteiik, Májilis tóraǵasy Erlan Qoshanov Ulytaýda ótken ulttyq quryltaida palata janynan ártúrli ustanymy bar saiasi uiymdar ókilderin, sarapshylar men qoǵam belsendilerin qatystyratyn Qoǵamdyq palata qurý týraly usynys aitqan bolatyn.
