Qazaqtyń belgili aqyny, qoǵam qairatkeri Fariza Ońǵarsynovaǵa arnalǵan «Tolǵam» atty kúi dúniege keldi. Kúidiń avtory - kompozitor, mádeniet qairatkeri Nurlan Bekenov, dep habarlaidy QazAqparat.
Astana Memlekettik akademiialyq filarmoniiasy halyq aspaptary orkestriniń dirijeri, kúishi Nurlan Bekenov atalǵan kúidiń qalai týǵanyn aityp berdi.
«Fariza Ońǵarsynovanyń qazaq ádebietindegi alatyn orny erekshe ekeni belgili. Búkil túrki áleminiń rýhani bailyǵyna qosqan úlesi de óte mol. Ol tereń lirikalyq óleńder jazǵan aqyn. Sonymen qatar adamǵa qairat beretin daýylpaz jyrlardyń da avtory. Ádebietimizge úlken jańalyq alyp kelgen qalamger ǵoi. Ózim biraz ýaqyt boiy Fariza aqynnyń jan-dúniesin ashatyn, halqyna aita almai ketken oilaryn jetkizýge tyrysatyn bir kúi shyǵarsam degen tolǵanysta júrdim. Ónerdegi ustazym, Astana Memlekettik akademiialyq filarmoniiasy halyq aspaptary orkestriniń kórkemdik jetekshisi ári bas dirijeri, Qazaqstannyń eńbek sińirgen qairatkeri, professor Aitqali Jaiymov aǵamyz jáne basqa da azamattar Farizaǵa arnalǵan kúi shyǵatyn bolsa, ol ulttyq ónerimizge qosqan naqty úlesimiz bolatynyn aitty. Maǵan osy turǵyda oilanyp, jańa shyǵarma jazý týraly keńes berdi. Mine, jýyrda ǵana jańa kúi dúniege keldi», - dedi Qazaqparat tilshisine bergen suhbatynda kompozitor Nurlan Bekenov.
Bul F. Ońǵarsynqyzyna arnalǵan tuńǵysh kúi ekenin aita ketken jón. 23 qańtar kúni «Astana» kontsert zalynda elordamyzdyń Memlekettik akademiialyq filarmoniiasy halyq aspaptary orkestriniń ujymy Fariza Ońǵarsynovanyń 80 jyldyǵyna arnalǵan arnaiy ádebi-mýzykalyq kesh ótkizgeli otyr. Sol keshte aqynǵa arnalǵan jańa ánder jáne atalǵan kúi oryndalady dep kútilýde.
