Qarjy monitoringi agenttigi birneshe JShS-ny reiderlik jolmen basyp alý deregi boiynsha sotqa deiingi tergeý júrgizip jatyr, - dep habarlaidy "Ult aqparat" vedomstvonyń baspasóz qyzmetine silteme jasap.
"Aldyn ala boljam boiynsha zardap shegýshige keltirilgen shyǵyn kólemi 18 mlrd teńgeden astam qarajatty quraidy. Biyl 14 shildede sot R. Babaev, T. Tanashev, D. Ábijanov jáne A.Altybasarovqa qatysty qamaýǵa alýdy sanktsiialady. Qospaev, Shalin jáne Imashevqa halyqaralyq izdeý jariialandy. Múlikti anyqtaý jáne tyiym salý sharalary qabyldandy", - delingen habarlamada.
QMA dereginshe, bul azamattardyń 9 million dollarǵa jýyq qarajaty buǵattalyp, zergerlik buiymdary tárkilengen.
"Kúdiktiler men olarǵa qatysty tulǵalardyń 154 jyljymaityn múlik nysany (turǵyn úi kesheninde 102 páter, 6 jekemenshik úi, 28 turǵyn emes úi, 11 ýchaske, bir saýda nysany, eki kólikjai, tórt kólik turaǵy), 19 kólik tárkilengen.
Sotqa deiingi tergeý jalǵasyp jatyr. QR QPK-nyń 201-babyna sáikes ózge málimet jariia etýge jatpaidy", - delingen habarlamada.
QMA atalǵan top músheleriniń reiderlik áreketinen zardap shekken azamattardan aryzdar áli túsip jatqanyn aitty. Qospaevtyń jáne basqa da tulǵalardyń áreketinen zardap shekken kásipkerlerdi QMA-ǵa nemese aýmaqtyq departamentterge habarlasýdy suraidy.
