Kommýnaldyq qyzmetter úshin 15 myń teńge tóleýge ótinim qabyldaý ákimdikter ótinim qabyldaityn arnaýly júieni iske qosqan soń bastalady. Bul týraly "Ult aqparat" QR Indýstriia jáne infraqurylymdyq damý ministrliginiń Telegram kanalyna silteme jasap habarlaidy.
«Kommýnaldyq qyzmetterdi jetkizýshilerdiń shyǵyndaryn óteý tártibi aǵymdaǵy jyldyń 18 sáýirinde bekitildi jáne búgingi tańda ákimdikter ótinimderdi qabyldaý úshin call-ortalyqtar men aqparattyq resýrstar qurý boiynsha shuǵyl sharalar qabyldap jatyr. Ákimdikter ótinimderdi qabyldaityn arnaýly júieni daiyndaǵannan keiin ol týraly jergilikti halyqty habarlandyrady. Atalǵan jumys múmkindiginshe qysqa merzim ishinde júrgiziledi. Sondyqtan ótinim berý úshin ákimdikterden tiisti aqparatty kútý qajet», - delingen habarlamada.
Sondai-aq atalǵan kózden málim bolǵanyndai, memleket aǵymdaǵy jyldyń sáýir jáne mamyr ailary úshin kommýnaldyq qyzmetterge aqy tóleidi, sondyqtan ótinim berýge asyqpaý qajet. Óitkeni barlyq ótinishter mamyr aiyn qosa alǵandaǵy kezeńde qabyldanady. Ótinimder call-ortalyqtar men aqparattyq júieler arqyly qabyldanady. Ákimdikterge tutynýshynyń jeke sáikestendirý nómirin, áleýmettik mártebesin jáne esepshotynyń derekterin usyný qajet.
Esterińizge sala keteiik, Qazaqstan Respýblikasy Prezidentiniń tapsyrmasyn oryndaý maqsatynda Indýstriia jáne infraqurylymdyq damý ministrligi Tótenshe jaǵdai kezeńinde kommýnaldyq qyzmetterdi jetkizýshilerdiń shyǵyndaryn óteý qaǵidalaryn bekitti.
