Kommertsiialyq emes uiymdar respýblikalyq biýdjettiń jartysyna qoǵamdyq monitoring júrgizýdi josparlap otyr. Bul týraly QR Sybailas jemqorlyqqa qarsy qyzmettiń áleýmettik jelidegi paraqshasynda bergen suhbatynda «INTEGRITY ASTANA» kommertsiialyq emes uiymynyń direktory Janat Nurǵaliev málim etti, dep habarlaidy QazAqparat.
«Qazirgi kezde Úkimet tarapynan daǵdarysqa qarsy sharalarǵa qomaqty qarjy bólinip jatyr. Tek Eńbek jáne halyqty áleýmettik qorǵaý ministrligi boiynsha eleýli qarjy qarastyrylǵan. Respýblikalyq biýdjet 13,8 trln teńge shamasynda. Densaýlyq saqtaý ministrligine 1,5 trln teńge tiesili. Sondyqtan joba aiasynda tórt ministrlik boiynsha qoǵamdyq monitoringige bastamashylyq jasaýǵa niettimiz. Bul óz kezeginde respýblikalyq biýdjettiń jartysyn qamtidy. Osy oraida Eńbek jáne halyqty áleýmettik qorǵaý, Densaýlyq saqtaý, Aýyl sharýashylyǵy, Saýda jáne integratsiia ministrlikteri eskerilgen. Nege biz osy ministrlikterdi aldyq? Búginde Úkimettiń daǵdarysqa qarsy sharalary aiasynda olar negizgi vedomstvolar bolyp tur», - dedi J. Nurǵaliev.
Onyń sózine qaraǵanda, atalǵan ministrlikterdiń biýdjetteri týraly málimet qoǵamǵa túsinikti túrde jetkiziledi, bul turǵyda el halqy qarjynyń igerilýi barysynan habardar bolady. «INTEGRITY ASTANA» bul jumysta memlekettik organdarǵa járdemdesedi.
Janat Nurǵalievtiń atap ótýinshe, tórt ministrliktiń biýdjetterin monitoringileý mamyr aiynan bastalyp, bul joba jarty jyl boiy júzege asyrylady. Jobaǵa táýelsiz sarapshylar qatysady. Biýdjetke taldaý jasalyp, qarjynyń tiimdi igerilýi baǵalanady.
