QR Qarjy ministrligi Memlekettik kirister komiteti jeke tulǵalardyń kólik, jer jáne múlik salyqtary boiynsha ózgeristerge túsinik berdi, dep habarlaidy "Ult aqparat".
«Memleket basshysy «Salyq jáne biýdjetke tólenetin basqa da mindetti tólemder týraly» Qazaqstan Respýblikasynyń Kodeksine (Salyq kodeksi) jáne «Salyq jáne biýdjetke tólenetin basqa da mindetti tólemder týraly» Qazaqstan Respýblikasynyń Kodeksin (Salyq kodeksi) qoldanysqa engizý týraly» Qazaqstan Respýblikasynyń Zańyna qol qoidy. Osy zańǵa sáikes jeke tulǵalardyń kólik, jer jáne múlik salyqtaryn tóleý bóliginde ózgerister engizildi», - delingen Qarjy ministrligi Memlekettik kirister komiteti málimetinde.
Jeke tulǵalardyń salyq mindettemelerin durys esepteý jáne kólik quraldaryn ielenýdiń naqty merziminiń ózgerýine bailanysty artyq tólemniń paida bolýyn boldyrmaý, kólik quraldaryna qate tólengen salyqty qaitarýǵa bailanysty áýre-sarsańǵa saldyrmaý maqsatynda jeke tulǵalardyń kólik quraldaryna salynatyn salyqty tóleý merzimi esepti jyldan keiingi jyldyń I-toqsanynyń sońyna aýystyrylady.
Bul norma turaqty bolyp tabylady. Zańda osy normanyń 2020 jyldan bastap qoldanylýy, iaǵni 2020 jylǵy mindettemeler boiynsha 2021 jyly tólem júrgizý kózdelgen.
Sondai-aq jeke tulǵalardyń múlik jáne jer salyqtaryn biriktirý eskerilgen.
«Atalǵan salyqtardy biriktirý salyq elementterin (salyq salý obektisi, salyq bazasy, mólsherlemeler, esepteý jáne tóleý tártibi) ózgertpei júzege asady. Bul jaǵdaida jer ýchaskeleri men múlik boiynsha salyq qoldanystaǵy tártipke sáikes jeke-jeke esepteledi. Bul rette salyq tóleýshige tólenýge tiis soma bir biýdjettik synyptama kodymen usynylady.
Osylaisha, bul norma jeke tulǵalar úshin tóleý tártibin jeńildetedi. Zańda bul normany 2020 jyldan bastap engizý kózdelgen, iaǵni 2021 jyly 2020 jylǵy mindettemeler boiynsha múlik pen jerge biriktirilgen salyqty tóleý kózdelip otyr», - dep atap ótilgen komitet habarlamasynda.
Kóppáterli turǵyn úilerdiń menshik ieleri úshin jer salyǵyn joiý qarastyrylǵan.
Kóppáterli turǵyn úilerdegi páterler ornalasqan jer salyǵyn tóleýden bosatý týraly norma ákimshilendirýdiń kúrdeli bolýyna jáne osy salyqty esepteý men jinaýǵa jumsalatyn shyǵyndardyń ózin aqtalmaýyna bailanysty.
«Osylaisha, kez kelgen salyq salý, eń aldymen, «salyq» túsiminiń ákimshilik shyǵyndardan edáýir joǵarý bolýy kerek, salyqtyq ákimshilendirý arzan bolýy kerek degen qaǵidaǵa basshylyqqa alynǵan. Zańda bul normany engizý 2020 jyldan bastap kózdelgen, iaǵni 2020 jyly osy jer ýchaskeleri úshin jer salyǵy tólenbeitin bolady. Bul norma jeke tulǵalar úshin salyq aýyrtpashylyǵyn jeńildetýge baǵyttalǵan», - dep atalyp ótken vedomstvo málimetinde.
