QR IIDM Azamattyq aviatsiia komiteti «Bek Air» áýe kompaniiasynyń ýájine jaýap berdi. Atalmysh áýe kompaniia ózine tiesili «paidalanýshy sertifikatyn jáne ushýǵa jaramdylyǵy sertifikattaryn zańsyz toqtatty» dep ótinish bergen bolatyn, dep habarlaidy "Ult aqparat".
Komitettiń habarlaýynsha, 2020 jyldyń 3 aqpanynda Nur-Sultan qalasynyń mamandandyrylǵan aýdanaralyq ekonomikalyq sotynyń qaýlysy shyqqan. Oǵan sáikes «Bek Air» áýe kompaniiasynyń Qazaqstannyń aviatsiialyq ákimshiligine qarsy paidalanýshy sertifikatyn jáne ushýǵa jaramdylyǵy sertifikattaryn toqtatý týraly sheshiminiń kúshin joiý týraly ótinishi boiynsha sot isi toqtatylǵan. Sot barysynda Qazaqstannyń aviatsiialyq ákimshiliginiń sarapshylary Almaty qalasyndaǵy áýe apatynan keiin áýe kompaniiasyna júrgizilgen jospardan tys tekserýdiń aralyq qorytyndylaryn usynǵan.
«Jospardan tys tekserýdiń aralyq aktisinde ushý qaýipsizdigine tikelei qater tóndiretin QR áýe keńistigin paidalaný jáne aviatsiialyq qyzmet týraly zańnama talaptarynyń aitarlyqtai buzýshylyqtary kórsetildi. Aralyq aktide kórsetilgen buzýshylyqtar paidalanýshy sertifikatyn toqtata turýǵa negiz bolady», - delingen sot qaýlysynda.
Qazaqstannyń aviatsiialyq ákimshiligi paidalanýshy sertifikaty qoldanysynyń toqtatylýyna «Fokker-100» ushaǵynyń apatqa ushyraýy sebep bolǵanyn habarlady. Bul týraly 2019 jylǵy 27 jeltoqsanda ushaq apatynan keiin «Bek Air» AQ-qa jiberilgen tikelei radiogrammada da kórsetilgen. Sheshim «QR áýe keńistigin paidalaný jáne aviatsiia qyzmeti týraly» zańǵa sáikes qabyldanǵan. Onda sertifikat ushý qaýipsizdigine tikelei qater tóndiretin zań talaptaryn aitarlyqtai buzýshylyqtar anyqtalǵan jaǵdaida shekteletini kórsetilgen.
«Bek Air áýe kompaniiasynyń ushaǵy apatqa ushyraǵannan keiin «Qazaqstannyń aviatsiialyq ákimshiligi» paidalanýshy sertifikatynyń jáne ushýǵa jaramdylyǵy sertifikattarynyń qoldanysyn toqtatty. Bul sheshim áýe kompaniiasynda keiingi úsh jyl ishinde eki iri oqys oqiǵanyń oryn alǵandyǵyna negizdelip otyr. Sonymen qatar, osy ýaqyt aralyǵynda jinalǵan ushý saǵattarynyń sanyna súiene otyryp, qaýipsizdikpen bailanysty máselelerdiń jiiligi – áýetasymaldaýshy úshin qaýipsizdiktiń ruqsat etilgen deńgeiinen edáýir joǵary boldy. Sertifikattardyń qoldanylýyn toqtata turý nátijesinde «Bek Air» áýe kompaniiasynyń qoldanystaǵy paidalanýshy sertifikatyn muqiiat tekserý jumystary bastaldy. Tekserý barysynda birqatar buzýshylyqtar anyqtaldy. Bul týraly Qazaqstannyń aviatsiialyq ákimshiligi buryn habarlaǵan edi», - dep málim etti komitetten.
Sondai-aq, tekserý áýe kompaniianyń áýe kemelerine jóndeý júrgizilgen «Bek Air»-diń tehnikalyq ortalyǵyn qamtyǵan. Nátijesinde birinshi deńgeidegi eleýli buzýshylyqtar anyqtalyp, sonyń negizinde aviatsiialyq tehnikasyna qyzmet kórsetý jáne jóndeý jónindegi uiymnyń sertifikaty eskertýlerdi joiǵanǵa deiin toqtatylǵan.
«Qazaqstannyń aviatsiialyq ákimshiligi «Bek Air» AQ qyzmetine qatysty 2019 jyldyń 27 aqpanyna deiin júrgizilgen jospardan tys tekserý nátijelerin áýe kompaniiasyna jiberedi. Hatty alǵannan keiin áýe kompaniiasy 10 kún ishinde ákimshilikke barlyq kemshilikti joiý boiynsha túzetý is-qimyldarynyń josparyn usynýy tiis. Eger buzýshylyqtar 6 ai ishinde joiylmasa, paidalanýshy sertifikaty men ushýǵa jaramdylyq sertifikattary keri qaitarylady», - dep eskertti komitetten.
