Búgin Almaty oblysy ákiminiń orynbasary Jaqsylyq Omardyń tóraǵalyǵymen oblys ákimdiginiń janyndaǵy kámeletke tolmaǵandar isteri men olardyń quqyǵyn qorǵaý jónindegi komissiianyń kezekti otyrysy ótti.
Kámeletke tolmaǵandar isi jónindegi másele boiynsha jetim balalar men ata-anasynyń qamqorlyǵynsyz qalǵan balalarǵa arnalǵan mekemelerdiń sanyn kezeń-kezeńmen qysqartý, balamaly nysandardy damytý, «Balalar úiinsiz Jetisý» jobasynyń júzege asyrylýy týraly oblystyq bilim basqarmasynyń basshysy Lázzat Bazarqulova baiandady.
Onyń aitýynsha, oblysta jetim jáne ata-analarynyń qamqorlyǵynsyz qalǵan 3071 bala bar. Qazirgi kezde sonyń 83,5%-i nemese 2564 bala otbasylardyń asyraýyna berilgen. Onyń ishinde 2446 bala qamqorlyqqa alynǵan, 70-i patronattyq tárbiege, 48-i otbasylyq úlgidegi úilerge ornalastyrylǵan. Biylǵy jyldyń 5 aiynda jetim balalar úilerinen 23 bala óz otbasyna oraldy.
Júrgizilip jatqan jumystarǵa qaramastan birqatar kemshilikter de oryn alyp otyr. Oblystyń biraz aýdandarynda, atap aitqanda Aqsý, Kerbulaq, Kóksý, Sarqan aýdandarynda «Balalar úiinsiz Jetisý» jobasynyń sheńberindegi sharalar báseń júrýde. Jambyl, Raiymbek, Uiǵyr, Alakól, Balqash aýdandarynda patronajdyq tárbie damytylmaǵan nemese baiaý damýda.
L. Bazarqulova patronattyq tárbieni damytý maqsatynda biylǵy jyly oblystyq biýdjetten 143 mln. 295 myń teńge bólingenin aitty. Sonymen qatar 2018 jylǵa patronajdyq tárbiege 60 balany ornalastyrý josparlanǵan.
Oblys ákiminiń orynbasary J. Omar komissiia jumysyn shiratý qajettigin, týyndap otyrǵan máselelerge bailanysty komissiia músheleri tarapynan jandy usynystar berilmei otyrǵanyn aityp ótti.
- Aiaýshylyq bildirý azdyq etedi, bizge naqty sharalar qajet. Áleýmettik saýalnama júrgizińizder, balalardyń qandai máseleleri bar ekenin anyqtańyzdar. Bul tárbiege de, oqytýǵa da bailanysty. Aldymen balalardyń pikirine qulaq túrińizder. «Balalar – bizdiń bolashaǵymyz» degen naqyldy jii aitamyz, sol balalarǵa qajetti kómek pen qoldaý kórsetý, tolyqqandy áleýmettendirýge qolaily jaǵdai jasaý - tikelei mindetimiz, - dedi J. Omar.
Jastar saiasaty jónindegi basqarmanyń jumysy da synǵa alyndy.
- Sizderdiń basty maqsattaryńyz – jumyssyz jastarmen jumys júrgizý. Eń aldymen solarǵa naqty qoldaý kórsetip, kásipti meńgerýlerine, turaqty jumysqa ornalasýlaryna járdemdesýlerińiz kerek. Sizder jastardyń qansha paiyzynyń arnaiy bilimi bar, qanshasynyń bilimi joq, qanshasy jumyspen qamtylǵan, qanshasy qamtylmaǵan – osynyń bárin bilýlerińiz kerek. Jaǵdaiǵa turaqty taldaý jasap, sonyń qorytyndysy boiynsha usynystar berýlerińiz qajet. Fleshmobtar ótkizý – bizdiń jumysymyzdyń kórsetkishi emes, naqty sharalardy júzege asyrýymyz kerek, - dedi J. Omar.
Jiyndy qorytyndylaǵan oblys ákiminiń orynbasary komissiia múshelerine oblystyń aýdan, qalalaryna shyǵyp, áleýmettik jetimdiktiń aldyn alý jumysy boiynsha aqparattyq-túsindirý jumystaryn belsendi júrgizýdi tapsyrdy. Sonymen qatar týyndaǵan máselelerdi anyqtaý maqsatynda jetim jáne ata-analarynyń qamqorlyǵynsyz qalǵan balalardyń arasynda áleýmettik saýalnama júrgizý týraly tapsyrma berildi. Taǵy bir mańyzdy baǵyt – quramyna biznes-qurylymdardyń, ÚEU-nyń ókilderi jáne basqa da bul máselege bei-jai qaramaityn azamattar kire alatyn patronajdyq uiymdar timizin qalyptastyrý qajet.
Sol siiaqty J. Omar óziniń jeke bastamasy boiynsha túrli jobalardy júzege asyra otyryp, tiisti nátijege qol jetkizetin úkimettik emes uiymdardyń rólin atap ótip, osy qurylymdarǵa qoldaý kórsetý máselelerin qarastyrýdy tapsyrdy.
