Májilis jáne máslihat sailaý ótetin kún - 10 qańtarda dene qyzýy bar azamattar sailaý ýchaskesine kirgizilmeidi. 29 jeltoqsan kúngi brifing kezinde Almaty qalasynyń aimaqtyq sailaý komissiiasynyń tóraiymy osylai dep habarlady. Al quqyq qorǵaýshy "dene qyzýy bar adamdardy daýys berý quqyǵynan aiyrý - adam quqyǵyn buzý" dep sanaidy.
Almaty qalasynyń aimaqtyq sailaý komissiiasynyń tóraiymy Janna Asanovanyń aitýynsha, 10 qańtarda qaladaǵy sailaý ýchaskeleriniń kire berisine kelgenderdiń dene temperatýrasyn ólshep turatyn arnaiy jabdyq ornatylady.
— Dene qyzýy bar sailaýshy sailaý ýchaskesine kirgizilmeidi. Olar daýys bermeidi. Sebebi, qazir koronavirýs juqqandar artyp barady, qaýip bar. Sailaý ýchaskesinde dene qyzýy kóterilgen adamdardan bólek, densaýlyǵyn qorǵaǵysy keletin adamdar bar ǵoi. Sol sebepti erejege sáikes, temperatýrasy bar adamdar kópshilik orynǵa jiberilmeidi, — dedi Asanova.
Sailaý komissiiasy ókilderiniń aitýynsha, densaýlyǵyna bailanysty nemese úide naýqas týysyn qarap, ýchaskege bara almaityn adamdar túski 12-den keshikpei jazbasha ótinish jazyp, sailaý komissiiasy múshelerin úige shaqyra alady. Asanovanyń aitýynsha, ótinishti sailaýshynyń ózi nemese senimdi ókili tapsyrýy tiis. Telefon arqyly ótinish qabyldanbaidy.
— Temperatýrasy bar kez kelgen adam sailaý ýchaskesine baryp, ainaladaǵy adamdardyń ómirin qaýipke tigedi dep oilamaimyn, quqyǵym buzyldy dep daýlamaidy dep sanaimyn, - dedi Asanova.
Ol maskasy joq adamdardyń da sailaý ýchaskesine kirgizilmeitinin aitty. Statsionarlarda koronavirýstan emdelip jatqan adamdarǵa aýrýhanada arnaiy ýchaskeler ashylady.
Liberty qoǵamdyq qorynyń jetekshisi Ǵalym Aǵeleýov dene qyzýy bar adamdy daýys berý quqyǵynan aiyrý - adam quqyǵyn buzý dep baǵalaidy.
— Olardyń daýys berýge quqyǵy bar - bul olardyń ajyramas quqyǵy. Karantinge silteý de durys emes. Memleket olarǵa balama múmkindik berýi tiis qoi. Eger adam daýys beretin kúni aýyryp qalsa, 12-ge deiin sailaý ýchaskesine habarlasa alady, komissiia músheleri jyljymaly jáshikpen kelip, daýys berýine jaǵdai jasaýy tiis. Adam temperatýrasy bar ekenin ýchaskege kelgennen keiin bir-aq bilýi múmkin ǵoi. Barlyq saqtyq sharalary saqtalýy tiis. OSK qaýlysymen ár komissiiada qorǵanysh kiim kigen meditsina qyzmetkerleri bolýy kerek. Bul qyzmetkerler jyljymaly jáshikpen sondai adamdarǵa qyzmet kórsetýge mindetti. Ózge elderde mundai tyiym joq, — dedi quqyq qorǵaýshy.
Qazaqstanda májilis jáne máslihat sailaýy 10 qańtarda ótedi.
