QR Premer-Ministriniń orynbasary Eraly Toǵjanovtyń tóraǵalyǵymen ótken Vedomstvoaralyq komissiia otyrysynda nysandardyń qyzmetin jeńildetýdiń ekinshi kezeńi maquldandy, dep habarlaidy QazAqparat primeminister.kz-ke silteme jasap.
Densaýlyq saqtaý ministrligi shekteý sharalary el boiynsha COVID-19 infektsiiasyn 10 esege, jedel járdemdi shaqyrý sanyn 4,2 esege, aýrýhanada jatqandardyń sanyn 80%-ǵa tómendetýge múmkindik bergenin, al mobildi brigadalar sany 7,6 esege artqanyn habarlady.
Qol jetkizilgen oń áserdi eskere otyryp, vedomstvoaralyq komissiia biyl 31 tamyzdan bastap kelesi nysandardyń qyzmetin qaita bastaý týraly sheshim qabyldady:
- dini obektiler (jeke, ujymdyq is-sharalar ótkizilmeidi);
- basseinder (jeke formatta, 1 kelýshige 5 sh. m. sý beti esebinen, aldyn ala jazylý arqyly);
- jattyǵý zaldary (1 kelýshige 5 sh. m. deiin, aldyn ala jazylý arqyly);
- sport keshenderi (1 kelýshige 5 sh. m. deiin jeke jáne toptyq jattyǵýlar úshin);
- mádeniet nysandary (1 kelýshige 5 sharshy metrge deiin, tolymdylyǵy 50%-dan aspaidy, onyń ishinde keminde 2 metr áleýmettik qashyqtyqty saqtai otyryp, 30 adamǵa deiin ujymdyq daiyndyqtar, úzilisterde bólmelerdi jeldetý, betperde taǵý);
- erekshe qorǵalatyn tabiǵi aýmaqtar: memlekettik ulttyq tabiǵi parkter, qoryqtar, rezervattar jáne t. b. (jeke jáne uiymdasqan toptar úshin 15 adamnan aspaityn, áleýmettik araqashyqtyqty saqtai otyryp, keminde 2 metr, betperde taǵý);
- qala mańyndaǵy jolaýshylar poiyzdarynyń/elektr poiyzdarynyń, qalaaralyq, oblysishilik avtobýstardyń/shaǵyn avtobýstardyń qozǵalysyna ruqsat beriledi.
«Barlyq nysan tiisti daiyndyq aktilerin alǵannan keiin ǵana jumysqa kirisýge ruqsat beriledi. Óńirlerdiń ákimdikteri densaýlyq saqtaý ministrligi, «Atameken« UKP-men birlesip, qoǵam belsendilerin tarta otyryp, engiziletin nysandardyń barlyq sanitarlyq talaptardy qatań saqtaýyn qamtamasyz etýi qajet», - dep atap ótti E. Toǵjanov. Keńes qorytyndysy boiynsha Premer-Ministrdiń orynbasary birqatar naqty tapsyrma berdi.
