Almaty oblysynda qulaǵan sanitarlyq aviatsiia qyzmetiniń An-28 ushaǵynyń bortyndaǵy aqparatty jazatyn apparaty - "qara jáshigi" tabyldy. Bul týraly Almaty áýejaiynda ótken brifingte investitsiia jáne damý vitse-ministri, ushaq apaty sebebin tergeitin arnaiy komissiia jetekshisi Roman Skliar habarlady, dep jazady "Ult aqparat" Azattyqqa silteme jasap.
"Oqiǵa ornynan obektivti aqparat quraly tabyldy. Ol Máskeýdegi memleketaralyq aviatsiia komitetine jiberiledi" dedi Skliar.
Onyń sózinshe, 3 qazanda apatqa ushyraǵan ushaq zaýyttan 1990 jyly shyǵarylǵan. 2018 jyldyń jazyna deiin ushýǵa jaramdylyǵy týraly sertifikat berilgen.
Almaty áýejaiynyń ushý qaýipsizdik jónindegi inspektsiiasynyń bastyǵy Viktor Aýshevtiń sózine qaraǵanda, órtengen ushaqtyń "qara jáshigi" kúigen.
3 qazan kúni keshke Almatydan Shymkentke aýyr jaǵdaida jatqan, bosanǵan áielge kómek kórsetýge ushyp shyqqan sanitarlyq aviatsiianyń An-28 ushaǵy apatqa ushyrap, borttaǵy bes adam túgel qaza tapqan. Resmi málimet boiynsha, ushaq Almatydan 28 kilometr ushyp shyqqan soń radardan joǵalyp ketken. Keiin ushaq Almaty túbinde, Ile aýdanynda apatqa ushyrap, janyp jatqan kúii tabylǵan. Ushaq elektr baǵandarynyń symdaryn úzip baryp qulaǵan.
Apat qurbandarynyń úsheýi - ekipaj músheleri, ekeýi - dáriger.
