Foto: videodan skrin
Aqtóbe qalasynda 10-synyp oqýshysy mektep aýlasynda 5-synypta oqityn balany teýip, qolyn syndyrǵan. Oqiǵa sabaqtan tys ýaqytta №36 orta mekteptiń aýlasynda boldy, dep habarlaidy Ult.kz Stan.kz aqparat agenttigine silteme jasap.
Jábirlenýshi balanyń anasy Aqjan Kárim áleýmettik jeli arqyly video úndeý jasady. Aitýynsha, oqiǵa 6 qazan kúni keshki saǵat 19:00 shamasynda bolǵan. Kelinshek ádildik talap etip, ulyna zábir kórsetken kináli tarapty jaýapqa tartýdy surady.
"Aisultanym 6 qazan kúni keshki saǵat 7:00 shamasynda ainaýǵa suranyp shyqty. №36 mekteptiń fýtbol alańyna oinaýǵa barady. Sol mektepte oqityn 10 synyp oqýshylary alańǵa keledi. Bularǵa “alańdy bosatyńdar” dep aitady. Bular oinap júredi. Sonyń ishinde meniń balamdy iterip qulatyp, aiaǵynan, iyǵynan tebedi. Balam esinen tanyp, jerde 1 saǵattai jatyp qalady. Joǵary synyp oqýshylary sol jerde oinap kúlip otyrady. Tepken bala ony ornynan turǵyzyp, synǵan qolyn odan saiyn burap, kótergen. Balam úige ózi keldi. Jedel járdem shaqyrdym. Balamnyń qoly syndy. Kómektesýlerińizdi suraimyn", – dedi oqýshynyń anasy Aqjan Kárim.
Úndeýde soqqyǵa jyqqan oqýshy anasymen aýrýhanaǵa baryp, emdelip jatqan jasóspirimmen kezdeskeni aitylady. Densaýlyq saqtaý basqarmasy bul málimetti joqqa shyǵaryp, bógde adamdardyń aýrýhanaǵa kirýi múmkin emes ekenin málimdedi.
"10 jastaǵy bala travmatologiia bólimine jatzyzyldy. Oǵan operatsiia jasaldy, keiin úiine shyǵaryldy. Aýrýhanada kúzet jáne ótkizý júiesi bar. Syrttan eshkim kirmeidi", – delingen basqarma habarlamasynda.
Qalalyq bilim bólimi 10-synyp oqýshysynyń mektepishilik esepke alynǵanyn habarlady.
"Mektep tarapynan tiisti organdarǵa habar ýaqytyly berilgen. Kelesi kúni ata analarmen quqyqtyq keńestiń otyrysy ótkizilip, túsindirý jumystary júrgizildi. 10 synyp oqýshysy mektepishilik esepke alyndy. Oqiǵaǵa qatysty quqyqqorǵaý organdary tergeý amaldaryn júrgizýde. Bilim bólimi men quqyqqorǵaý organdary birlesip, kámeletke tolmaǵandar arasyndaǵy quqyqbuzýshylyqtardyń aldyn alý maqsatynda qosymsha profilaktikalyq jumystardy kúsheitti",- dedi Aqtóbe qalasyndaǵy №36 direktory Baýyrjan Sarin.
Aqtóbe qalalyq Politsiia basqarmasy Qylmystyq kodekstiń 107-baby boiynsha is tirkelgenin rastady.
"Oqiǵanyń mán-jaiyn anyqtaý úshin tergeý júrgizilip jatyr. Kúdiktiniń ata-anasy bala tárbiesine salǵyrt qaraǵany úshin jaýapkershilikke tartylady", – dep habarlady politsiia.
