Ortalyq Kolýmbiiada prezidenttiń áýeparkine tiesili Bell 412 tikushaǵy apatqa ushyrap, saldarynan ekipajdyń alty adamy túgeldei qaza tapty.Bul týraly Kolýmbiianyń Áýe kúshteri jariia etti, dep habarlaidy Xinhua.
«Kolýmbiianyń Áýe kúshteri 0006 tikushaq ekipajynyń alty adamynan aiyrylǵanyna qatty qaiǵyrady», – dep málimdedi áskeri mekeme ókilderi.
Aldyn ala boljamdar boiynsha, apatqa qolaisyz aýa raiy sebep bolýy múmkin. Tikushaq juma kúni joǵalyp ketken, qutqarýshylar onyń qulaǵan ornyn endi ǵana taýyp, qaza tapqandar sanyn naqtylai aldy.
Buǵan deiin osy tikushaqpen birneshe ret ushqan Kolýmbiia Prezidenti Ivan Diýke qaza tapqandardyń otbasylaryna kóńil aitty.
«Apat meniń de janymdy aýyrtty, sebebi bul adamdarmen men sońǵy 14 aida birge jumys istep edim», – dedi Diýke.
