Kez kelgen azamat elimizdegi kolledjderdiń TOP-100 stýdentin anyqtaýǵa atsalysa alady, dep habarlaidy "Ult aqparat".
QR Bilim jáne ǵylym ministrliginiń málimetinshe, respýblikalyq baiqaýǵa 338 adam qatysyp jatyr. Joba jeńimpazdary óz mamandyǵy boiynsha kásiporyn basshylarynan jumysqa ornalasýǵa shaqyrý alady
«Qazaqstan Respýblikasy kolledjderiniń TOP-100 stýdenti» baiqaýynyń respýblikalyq kezeńi bastaldy. Joba talantty jastardy qoldaýǵa jáne jumysshy mamandyqtaryn dáripteýge baǵyttalǵan.
Respýblikalyq kezeńge irikteý arqyly úlgerimi jaqsy jastar, stýdenttik ózin-ózi basqarý jáne eriktiler qozǵalysynyń kóshbasshylary, «World Skills» halyqaralyq chempionattarynyń, olimpiadalardyń, sporttyq jarystardyń, innovatsiialyq ideialar konkýrstary men startap-jobalardyń qatysýshylary men jeńimpazdary ótti.
«Bul - jai ǵana áleýmettik joba emes. Baiqaý qatysýshylary arqyly biz oqýshylar men olardyń ata-analaryna kolledjde oqýdyń artyqshylyqtary týraly aqparat berip jatyrmyz. Tipti daýys berý kezinde jetistikterge jetken stýdentterdiń ómirinen qyzyqty málimetterdi bilip, kadrlardy daiarlaý baǵyttarymen tanysýǵa bolady. Jalpy baiqaý kolledj deńgeiindegi, aimaqtyq jáne respýblikalyq, iaǵni osy úsh kezeńnen turady. Úzdik stýdentter 20 qazanǵa deiin jalǵasatyn onlain-daýys berý arqyly anyqtalady. Ol úshin joba saityna kirip , daýys berý qajet. Internet-resýrsta qatysýshylar týraly barlyq aqparat jariialanǵan. Joba barysy bolashaq jumys berýshilerdiń baqylaýynda, olar jeńimpazdarǵa «Job offer» jiberip, stýdentterdiń oqýy aiaqtalǵan soń jumysqa alady», – dedi QR BǴM Tehnikalyq jáne kásiptik bilim departamentiniń direktory Nasymjan Ospanova.
Baiqaý qatysýshylarynyń basym bóligi «Mehatronika», «Robototehnika jáne kiristiriletin júieler», «Web-dizainer», «Dánekerleýshi», «Tehnik-elektronshy», «Sýpervaizer», «Qutqarýshy», «Elektr jabdyqtaryn montajdaýshy» jáne basqa da mamandyqtar boiynsha bilim alyp jatyr.
«Jumys berýshiler bolashaq mamandardy óndiristik tájiribege shaqyrýǵa, óndiris barysymen tanystyrýǵa daiyn. Jalpy kolledjderde 500 myńǵa jýyq stýdent bilim alyp jatyr, jyl saiyn shamamen 140 myń azamat oqýyn aiaqtaidy. Qazaqstandyq kolledj túlekteriniń jumysqa ornalasý kórsetkishteri óte jaqsy. Máselen, túlekterdiń shamamen 70%-y diplom alǵannan keiin birden jumysqa ornalassa, qalǵandary kóbinese joǵary oqý oryndarynda oqýyn jalǵastyryp jatyr «, – dep atap ótti Nasymjan Ospanova.
