Bilim jáne ǵylym ministrligi elimizdegi kolledjderde syrttai oqýǵa arnalǵan biliktilik tizimin aitarlyqtai qysqartty. Endi stýdentter 53 biliktilik boiynsha bilim ala alady, dep habarlaidy "Ult aqparat" vedomstvonyń baspasóz qyzmetine silteme jasap.
Salystyrmaly túrde aitar bolsaq, eki jyldan astam ýaqyt buryn 595 biliktilik boiynsha syrttai bilim alýǵa bolatyn. Biraq oqytýdyń bul túri stýdentterge sapaly daǵdylardy bermeitindikten, ministrlik olardy qysqartý boiynsha kezeń-kezeńimen jumys júrgizdi. Bul joly syrttai oqý «Quqyq», «Bilim berý», «Servis, ekonomika jáne basqarý» jáne basqa da kadrlardy daiarlaý beiinderi boiynsha alynyp tastaldy.
«Búgingi tańda tehnikalyq jáne kásiptik bilim berý salasyndaǵy kadrlardy daiarlaýǵa qoiylatyn talaptardy eńbek naryǵy men jumys berýshiler belgileidi. Ol úshin biz syrttai oqý túrinen bas tartyp jatyrmyz. Sondai-aq mundai sheshimdi qabyldaýǵa túlekterdiń oqýdy bitirgennen keiin alatyn bilim men daǵdylarynyń jetkiliksiz sapasy sebep boldy. Kolledjder stýdentterge jumys ornynda bilim alýǵa múmkindik beretin iri kásiporyndarmen jáne biznespen tyǵyz bailanysta jumys isteidi. Iaǵni bul oqytýdyń dýaldy formasy. Bul búginniń ózinde bilim sapasyna oń áserin tigizip keledi. Syrttai oqytý tiziminen talap etilmegen biliktilikter, onyń ishinde daiyndyq sáikestigin eskere otyryp, bireýine biriktirilgender alynyp tastaldy. Jalpy biz qysqartý jumystaryn ári qarai jalǵastyramyz», - dep atap ótti QR BǴM Tehnikalyq jáne kásiptik bilim departamentiniń direktory Nasymjan Ospanova.
