Endigi ýaqytta elimizde kólik satqan adamnyń shotyna aqsha aýdarylǵanda avtombil iesi avtomatty túrde ózgeredi. Bul týraly Úkimet otyrysynda QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin aitty, dep habarlaidy QazAqparat.
«Egov-ta 600-ge jýyq qyzmet bar. Servister sanynyń kóptigine bailanysty ár qyzmetti adamdardyń oiynan shyǵatyndai qylyp yńǵaily jasaý óte qiyn másele. Halyqaralyq tájiribege sáikes, onlain qyzmetterdi basqa da tanymal tuǵyrnamalarǵa shyǵarý qajet dep sheshtik. Endi jeke kásipker retinde tirkelý Kaspii.kz, Halyq bank, Alfa bank jáne Sberbank qosymshalarynda da qoljetimdi. Basqa da keń taralǵan qyzmetterdi osylai shyǵarý josparlanýda», - dedi ministr.
Sonymen qatar, ol halyq kóp talap etiletin qyzmetterdi ońtailandyrý jumysy júieli túrde júrgizilip jatqanyn aitty.
«Mysaly, Mamandandyrylǵan halyqqa qyzmet kórsetý ortalyqtaryna jyl saiyn 3 mln-nan astam halyq júginedi. Úlken kezek bolyp jatady. Azamattar avtokólikterdi tirkeý qyzmeti onlain bolsa da HQKO-ǵa tikelei kelip, birneshe saǵat ýaqytyn jumsaidy. Osy máseleni talqyladyq. Jańa protsess boiynsha satyp alýshy kólik satatyn adamnyń shotyna aqsha aýdarǵanda kólik iesi avtomatty túrde ózgeredi. Dál búgin osy yńǵaily servisti ilki rejimde Kaspii.kz mobildik qosymshasyna shyǵardyq», - dedi ol.
Ministr kreditke alynǵan kólikterdi tirkeý boiynsha Halyq jáne Sberbanktermen jumys istep jatqandyqtaryn atap ótti.
«Osylaisha, Mamandandyrylǵan HQKO-larda tek júrgizýshi kýáligin alý qyzmeti qalady. Óitkeni, avtodromda emtihan tapsyrý qajet. Biraq, qazirgi ýaqytta avtodromdar ShQO men Túrkistan oblystarynda joq», - dedi Baǵdat Mýsin.
