Foto: Tengrinews.kz
Astanada kólik salasyn damytý jumysy aqsap tur. Bul týraly Memleket basshysy Qasym-Jomart Toqaev elordany damytý máseleleri jónindegi keńes otyrysynda aitty, dep habarlaidy "Ult aqparat" Aqordanyń baspasóz qyzmetine silteme jasap.
«Taǵy bir mańyzdy másele – Astananyń kólik júiesin damytýǵa qatysty. Avtokólik sany jyl saiyn kóbeiip jatyr. Sol sebepti, kólik keptelisi óte kúrdeli máselege ainaldy. Bul, tipti, qala turǵyndarynyń ashý-yzasyn týǵyzyp otyr.
Mysaly, Máńgilik el dańǵyly keptelisten kóz ashpaidy. Táýelsizdik dańǵylynda salynyp jatqan kópirdiń qurylysyn osy jyldyń sońyna deiin aiaqtaý qajet. Sonymen qatar, kishi ainalma joldyń qurylysy sozylyp ketti. Onyń ústine, jańa turǵyn úi keshenderin salǵanda jol máselesi tolyqqandy eskerilmei jatyr.
Bir sózben aitqanda, kólik salasyn damytý jumysy aqsap tur. Sondyqtan, máselemen júieli túrde ainalysý qajet» - dedi Prezident.
Sondai-aq, ol qala joldarynyń jai-kúii de máz emes ekenin basa aitty.
«Mysaly, keibir kósheler jyl saiyn jóndeledi. Biraq kóktem shyqqanda joldyń sapasy syn kótermeidi.
Al, keibiri múldem qaraýsyz qalǵan. Bul – jol salý jáne jóndeý jumystary durys júrgizilmeidi degen sóz. Bul máseleni Úkimet men ákimdik arnaiy qaraýy kerek. Qajet bolsa, merdigerlerdi aýystyrýǵa tiis» - dedi Memleket basshysy.
Qasym-Jomart Toqaevtyń sózinshe, Astanaǵa 400-den astam avtobýs jetispeidi.
«Kelesi másele – qoǵamdyq kólik júiesin damytý. Men qala ishinde adam kóp júretin baǵyttardy anyqtap, avtobýstyń jii qatynaýyn qamtamasyz etý jóninde naqty tapsyrma berdim.
Biraq turǵyndar áli kúnge deiin aialdamada jarty saǵat boiy turýǵa májbúr. Tipti, keide jolaýshylar avtobýsqa syimai jatady. Qazir Astanaǵa 400-den astam avtobýs jetispeidi. Aldaǵy 5 jylda bul tapshylyq 2 ese artýy múmkin. 400 aialdamada avtobýs toqtaityn arnaiy oryn qarastyrylmaǵan. Al 300 aialdamada jabyq pavilon joq. Bul másele, ásirese, qys kezinde óte ózekti.
LRT-ǵa qatysty jumysty meilinshe tezdetip aiaqtaý kerek. Men buryn da aittym, LRT jobasy negizinen qate boldy. Biraq qazirgi tańda basqa amalymyz joq, bul jobany júzege asyrýymyz kerek. LRT-nyń qurylysyn toqtatsaq, shyǵyn odan da kóp bolady. Al, balama jobalar joq. Jalpy, ákimdikke Úkimetpen birlesip, Astananyń kólik júiesin damytýǵa arnalǵan keshendi baǵdarlama ázirleýdi tapsyramyn» - dep túiindedi Prezident.
